Awe Stichting Salud Pa Bida hunto cu specialista Delano Ponit a tene presentacion di sistema di Hydroponic. Saskia Budel kende ta un Gewichtsconsulent a haya e necesidad pa trece e presentacion aki, como cu e ta un manera facil pa un persona cuminsa planta y crece su mesun fruta y berduranan. Asina evita e costo halto cu ta paga na supermercado, cu personanan ta keha di dje, pero tambe evita di come cuminda injecta cu tur sorto di cos. Sr. Ponit ta di Suriname unda cu e tin su sistema di Hydroponic y actualmente e ta na Aruba unda cu el a duna presentacion na un grupo di Fantastic Gardens. Segun Sra. Budel, e cifranan di malesanan chronico manera diabetes tipo 2, presion halto y cholesterol halto, ta aumentando mas y mas y ta un preocupacion grandi. Door di cambio di estilo di bida, por controla e malesanan chronico aki mas miho, y den algun caso por hasta kita of elimina esaki.
Pero kico ta un cambio di estilo di bida? con bo ta haci esaki? Con largo bo mester haci esaki? Unda bo ta cuminsa? Sra. Budel a mustra riba cambionan cu por haci ora cu ta scoge algo pa come of pa bebe cu ta cuminsa chikito, pero cu tempo por significa un bida mas dushi y largo pa bo. Ehempelnan cu el a menciona ta awa, en bes di cola, pan volkoren en bes di pan blanco, pasta volkoren en bes di pasta blanco entre otro. Tambe Sra. Budel a amplia den e comemento di hobennan, mencionando cu mas y mas hende di edad hoben ta cuminsa sufri di malesanan chronico di sucu entre otro pa motibo di comemento malo.
Sr. Ponit a haci uzo di slides masha interactivo cu ta mustra con ta cuminsa cu un simiya y te na momento cu e ta bira un mata di lechuga por ehempel. E sistema di hydroponics lo costa apenas 7 florin pa luna (awa y coriente) segun calculacion haci pa Sr. Ponit y ta algo cu bo por cuminsa cun’e como hobby y experimentando pa bo mes, te eventualmente na un escala mas halto. E ta kere cu e ta algo cu hopi hende ta interesa aden, semper e ta haya hopi pregunta y hende interesa den e funcionamento di e sistema y ta kere cu definitivamente scolnan por yuda envolvi muchanan tambe mas den esaki, cual ta stimula comemento saludabel y estilo di bida saludabel tambe. Finalisando el a bisa cu e unico aspecto menos positivo cu tin ta e comienso unda cu mester cumpra tur e ekipo pa inicia cu e plantacion, pero hasta esey awendia ta mas facil pasobra por hayanan cla traha caba, y ta trata tubonan cu por wordo uza pa 10 of 20 aña sin mester wordo cambia.
