E show di producto electronico pa consumidor di mas grandi di e nacion a tene Ivanka Trump como keynote speaker – un escogencia cu a cay den mal tera cerca muhenan den sector tecnologia.
Ivanka Trump a papia pa casi 40 minuut riba escenario diamars cu Gary Shapiro, presidente di organisado di CES, Consumer Technology Association. El a resalta e trabou cu administracion a haci cu companianan tecnologico pa entrena nan trahadonan pa habilidadnan nobo.
Durante a show no a menciona e critica. E sitio tabata yen di hende y Trump a ricibi aplauso. Organisadonan a nenga di bisa cuanto hende tabatin den e audiencia.
Pero pa critico y activistanan kende pa largo a pusha pa reconocemento mas amplio pa e muhenan menos conoci kende a funda startup y ta tuma retonan tecnologico dificil, e inclusion di yiu muhe di presidente Donald Trump, kende tambe ta un consehero di Cas Blanco, a manda e mensahe robes.
“Ivanka no ta un muhe den tecnologia”, a tweet Brianna Wu, un desaroyado di videogame kende ta campañando pa Congreso na Massachusetts como un democrata. “E no ta un CEO. E no tin background. Ta un intento floho pa emula diversidad.”
Shapiro a bisa AP prome cu presentacion cu Ivanka Trump ta luchando pa trahadonan na un momento den cual robot ta yenando bodega y fabrica y vehiculonan autonomo ta preocupando coredo di truck. “Nos a yega di tin politico duna discurso den pasado, secretario di gabinete y otronan”, Shapiro a bisa.
Ivanka Trump a traha riba iniciativanan pa entrenamento di habilidad na Cas Blanco. Companianan incluyendo Google a uni e esfuerso aki. El a uza su presentacion pa papia riba e naturalesa di cambio di trabou. “Hende mester pensa riba inverti den nan forsa laboral pa nan por habilita e hendenan ey pa haci e mesun trabou uzando ekipo diferente mañan”, el a bisa.
Como protesta pa presentacion di Trump cantidad di hende a tweet #BoycottCES diamars, criticando tambe politica di detencion di e administracion y varios acto di e presidente mes.
Industria tecnologico tin asuntonan importante pendiente cu gobierno Mericano, incluyendo investigacionnan anticonfiansa pendiente riba Facebook y Google, guera comercial cu China, inmigracion, siguridad electoral y desinformacion riba rednan social.
Pa largo, oficialnan gubernamental a haci apariencianan regular na CES. E aña aki, por ehempel, e speakernan ta inclui tanto Secretario di Transporte, Elaine Chao como Secretario di Energia, Dan Bouillette. Otro oradornan femenino ta inclui Meg Whitman di startup di video Quibi y Linda Yaccarino, presidente di NBCUniversal.
Segun Rachel Sklar, comentador di tecnologia y fundado di un red profesional pa muhe, a bisa cu Ivanka trump ta “tumando e luga aki na e conferencia unda muhenan pa largo ta bisando ‘hey, nos ta wordo ignora’. Henter e categoria di muhenan ignora ainda ta ser ignora.”
