Casi un luna y mey despues cu e hoben Colombiano, Andres Felipe Henao, conoci como ‘Kendo,’ a sufri un accidente severo, su recuperacion ta uno slow pero satisfactorio.

Bon Dia Aruba a haci un siguimento di e echo aki. Presidente di Asociacion Amigos de Colombia (ASOCOL), Moises Fernandez a declara na e matutino aki cu Andres Felipe di biaha a haya e atencion necesario na Cali (Colombia). “Andres ta den bon recuperacion, danki na Dios,” el a bisa

E asociacion aki a ricibi un potret di dje haciendo terapia y para ariba su propio pia, locual ta un bon señal. Ainda e mester un periodo di terapia largo, te ora e hoben Andres por logra recupera totalmente. E ta un proceso di recuperacion largo pasobra e lesion cu Andres Felipe a sufri tabata uno bastante delicado riba su weso di lomba, pero e ta bay supera esaki positivamente, presidente di ASOCOL a bisa.

Igualmente el a gradici tur esunnan di bon curason cu a contribui cu nan campaña di recaudacion di fondo pa yuda e hoben accidenta. El a duna un rapport di e ayudo cu e asociacion aki a ricibi. Nan a colecta 5 miyon di peso Colombiano cu ta un suma di 2.900 florin cu nan a mand’e.

“Nos tur a pone un contribucion den esaki y nos kier expresa un gradicimento grandi na tur hende cu a duna nan colaboracion,” Moises Fernadez a bisa.

El a expresa cu e contribucion mas grandi cu nan a ricibi a bin for di e parokianonan cu ta asisti na e Misa di Fatima. Pero Fernandez su palabra di danki ta dirigi na tur hende cu a scucha nan yamado, y cu nan a bin boluntariamente pa duna nan contribucion monetario pa yuda den e necesidad aki.

Dia 28 di september, henter comunidad y muy specialmente e colonia Colombiano, a wordo conmovi cu e accidente di un hoben di 24 aña, Andres Felipe Henao conoci como ‘Kendo’ kende a bin participa den un evento deportivo di Crossfit na Aruba.

E situacion di e hoben aki tabata uno delicado, y e mester wordo transporta cu urgencia pa su pais debi cu e lesion fisico cu el a sufri, tabata mustra cu e no por a move mas. E tabatin mester di e atencion medico necesario. Na Aruba dificilmente nan por oper’e, mirando cu tabata un operacion peligroso cu tabata demanda specialistanan y ekiponan special.

Den su mensahe cu e hoben Andres Felipe Henao, conoci como ‘Kendo,’ a yega di expresa den social media ora cu el a yega Colombia, el a bisa na Spaño; “Muchachos, excelente servicio. Sí, señores, llegamos a Cali. Gracias, Dios. Gracias, muchachos. A todos los que me han apoyado, muchas gracias, Dios los bendiga”.

 

 

LEAVE A REPLY

Please enter your comment!
Please enter your name here