E whistleblower cu a duna inicio na e investigacion di Camara di Representante Mericano cu por conduci na un proceso di ‘impeachment’ (destitucion) di presidente Trump, lo no aparece dilanti e comision di inteligencia di Camara, asina presidente democrata di e comision, Adam Schiff, a declara.

“E comision … lo no facilita esfuerso di presidente Trump y su aliadonan pa menasa, intimida y tuma venganza contra e whistleblower cu a mustra curashi dunando e alarma inicial,” Schiff a bisa den un carta na representante republicano Devin Nunes emiti diasabra nochi.

E investigacion ta concentra riba e intentonan di presidente Trump pa logra cu Ucrania lo a investiga su rivalnan politico, a cambio di casi 400 miyon dollar na ayudo militar y un bishita di presidente Volodymyr Zelenskiy na Cas Blanco.

E comision di Camara di Representante te awor a haci e entrevistanan tras di porta cera, pero e siman aki lo cuminsa cu e audiencianan publico, cu lo sali na television integralmente. Esaki lo trece hopi memoria di e audiencianan teni den e caso di impeachment di Richard Nixon y mas reciente Bill Clinton. E testimonionan por escrito di e entrevistanan teni den ultimo simannan ta mustra particularmente dañino pa ‘chief of staff’ interino Mick Mulvaney pa su aparente papel den e ‘quid pro quo’ (un fabor a cambio di otro).

Mulvaney y algun otro testigonan clave di staf di Cas Blanco a nenga di aparece diabierna pasa desafiando orden di Congreso. Di otro banda, e democratanan ta evita bay corte cu e orden di aparece pasobra esaki lo ta bay tuma demasiado tempo, mientras cu e pensamento ta cu por tin e proceso final den e Camara ainda prome cu Pasco. E audiencianan publico lo cuminsa diaranson venidero.

 

LEAVE A REPLY

Please enter your comment!
Please enter your name here