(BBC) – Presidente di Brazil Jair Bolsonaro a sali di hospital Diadomingo atardi, cuater dia despues cu el a keda interna cu problemanan intestinal serio.

Bolsonaro, 66, tabata sufri di hikmento persistente pa 10 dia. Tabatin preocupacion pa su salud desde cu el a haya hinca den su bariga na 2018. E tempo ey, Bolsonaro a keda gravemente herida y a perde 40 porciento di su sanger, y mester a pasa den varios operacion.

Despues di tratamento pa un obstruccion den su intestino, sin cu tabatin necesidad pa operacion, e por a bolbe cas y a priminti di lo a bolbe oficina ayera. “Unicamente Dios por kita mi di e stoel ey,” Bolsonaro a bisa na salida di hospital, referiendo na su Presidencia. “Mi tabata kier a sali for di e prome dia, pero nan no a permiti mi. Mi ta spera cu denter di 10 dia mi lo por come tur cos cu mi kier.”

Tambe Jair Bolsonaro, politico ultra-derechista a rechasa e acusacionnan di corupcion recien di parti di su ex Minister di Salud riba negociacionnan pa cumpra vacunanan cu tabata mucho caro. E acusacionnan aki ta parti di un encuesta parlamentario grandi, pa investiga e forma con Gobierno di Brazil a responde na e pandemia di COVID-19.

Despues di dos aña y mey di un presidencia controversial, Bolsonaro ta bou presion constante pa e forma con el a maneha e pandemia. Na comienzo di Juli, algun 10 mil persona a subi caya pa protesta e sospechonan di corupcion.

E lider Brazilero ta hopi critica pa e falta di un reaccion nacional pa e crisis, y su propio skepticismo pa e vacuna, uso di tapaboca, y hasta ‘lockdowns’ a crea hopi confusion na Brazil. Hopi di su siguidornan no a tuma e pandemia na serio.

Luna pasa, e cantidad di morto debi na COVID-19 a surpasa 500 mil hende, cu ta e cifra mas halto na mundo despues di Merca. Bolsonaro mes a haya COVID-19, pero a recupera completamente.

LEAVE A REPLY

Please enter your comment!
Please enter your name here