AMResort tin 8 hotel of marca den diferente destino cu nan ta maneha pa e Grupo Martinón. Cada un di nan tin un target of obhetivo bon defini. Pa medio di un invitacion cu nan a formula pa un Fam Trip un grupo di prensa local, por a bishita varios di su producto hotelero: Secrets Royal Beach, Secrets Cap Cana, Breathless y Now Onyx.

Awor nan lo extende e marca Secrets na Aruba, cu e construccion di e prome fase di 600 camber na Sero Colorado, cu lo inicia entrante luna di november awor. E construccion lo dura dos aña. Aunke nan hotelnan ta ‘all inclusive,’ nan ta prefera di yam’e un ‘Unlimited-Luxury’ pasobra nan ta inclui mas cos compara cu e tradicional all inclusive.

‘Unlimited-Luxury’ ta un plan di luho ilimita cu ta wordo refleha riba e parti di alimento, bebida y servicio personal. Nan marcanan tin un serie di caracteristica cu ta identifica nan: Nan clientenan no mester bisti banchi, 24 ora di room service y conciërge inclui, mini bar cu ta wordo surti cu awa, cerbes tur dia, bebida premium, acceso ilimita na cuminda gourmet y no mester reservacion, juice y refresco ilimita, tur tax y gratuities, etc.

Pero fundamentalmente nan ta consciente cu e detayenan chikito ta esunnan cu ta haci un diferencia den e mundo competitivo di industria hotelero y turistico internacional. For di un prome instante nan ta busca e manera con pa crea un diferencia cerca nan bishitantenan, cu detayenan senciyo cu ta crea un impacto grandi ora cu bo ta yega na nan hotel.

E bishitantenan ta wordo ricibi no solamente cu un sonrisa y cordial bonbini di nan personal, pero cu un bebida refrescante y un serbete humedo perfuma cu un fragancia fresco y agradabel pa alivia bo curpa di e calor Caribeño di Republica Dominicana. Otro impacto lo ta ora cu bo ta drenta bo camber. Bo sinti di olfato lo haya e impacto di un aroma dushi y suave cu lo keda den bo memoria como un recuerdo bunita di bo experiencia den e hotel aki. Dos impacto den bo sinti di smaak y olfato cu ta laga bo marca pa semper.

Secrets Royal Beach

Presidente di Grupo Martinón, Enrique Martinón, a bisa cu nan kier bin cu e marca Secrets na Aruba. Pero niun di nan hotel ta igual, ya cu cada un di nan tin su personalidad propio. Ademas nan edificionan y infrastructura, nan ta diferente. Pero si nan cantidad di piso no ta mas halto cu tres piso. Den e caso di nan proyecto na Aruba, e lo wordo adapta na loke nos isla tin como paisahe.

El a defini cu nan clientenan tin un entrada y poder adkisitivo halto. Nan ta un cliente cu aunke nan tin e beneficio di nan ‘Unlimited-Luxury’, cu ta inclui bebida premium, room service y otro ofertanan cu nan resortnan tin; tambe nan ta clientenan cu ta gusta sali y gasta. Esaki basa riba nan propio experiencia. Generalmente nan resort na Cancun (Mexico) –segun Matinón– mas cu un 30% di nan clientenan ta sali pa disfruta di loke tin pafo di e hotel. Pero e ta haya cu ta importante cu e sitio unda nan hotelnan ta localisa tambe mester por ofrece alternativanan na e bishitantenan, unda nan por bay pa haci actividad, diberti, come den restaurantnan local, etc.

Luis Nuñez, kende ta Director Regional Comercial di AMResort na Republica Dominicana, a bisa cu nan kier drenta cu pia drechi na Aruba, ya cu e ta un sitio cu AMResort kier a drenta pa basta tempo y nan ta bin cu e marca Secrets, cu ta luho y romanico pa adulto mayor cu 18 aña. El a defini e presencia di nan marca Secrets na Aruba como algo cu ‘ta emocionante, agradabel y yamativo. Pero tambe un compromiso’ el a bisa. Un compromiso –segun Nuñez– cu e isla mes y su medio ambiente; pero un compromiso cu su hendenan y nan calidad di bida. El a trece dilanti e caso di Costa Rica, unda ta existi reglanan stricto di proteccion di medio ambiente, y nan proyectonan hotelero cu tin den e pais Centro Americano aki ta proyecto madura caba cu varios aña di existencia y nan ta exitoso.

E marca Secrets tin un miho presencia den e mercado Mericano y cerca cliente di ‘balor halto.’ Nan tin un capacidad di penetracion grandi na Merca. Nuñez, kende por cierto ta papia un tiki di Papiamento –ya cu el a yega di biba na Corsou un tempo– ta haya cu un hotel asina ta pas cu e producto y obhetivo di Aruba su industria turistico.

“Bosonan como Arubiano a haci un trabou espectacular na nivel di conexion y nos kier uni nos mes na e bon trabou cu bosonan a realisa pa sigui asina riba e bon caminda. Y tambe pa sigui mira e resultadonan pa medio di un indicador di e RevPar (Revenue per available room) cu ta esun mas beneficioso pa un destino turistico, pa e sigui crece ,” Nuñez a declara.

Director di Benta di Secrets Royal Beach, Patricia Alvarez a bisa cu e hotel aki tin 464 camber style Caribeño. Nan tin clientenan cu ta ripiti, ya cu nan ta gusta cu nan cambernan ta grandi, mas bien nan ta suite. Esaki a bira un atractivo pa e tipo di clientenan cu e marca Secrets ta dirigi su mes.

Alvarez a bisa cu nan aroma masha special ta forma parti di nan standard particular, ya cu e olfato ta un sinti cu cerebro ta registra y recorda pa mas tempo. “Pa medio di e sinti aki ta crea recuerdo y experiencia cerca nos huesped. Y esey ta net loke nos ta busca! Cu e bishitante lo por bay cu un experiencia multi sensorial y cu nan por recorda nan vakantie y experiencia den Secrets semper,” el a declara na Bon Dia Aruba.

Secrets Cap Cana

Otro hotel di e marca aki ta Secrets Cap Cana. Director di Benta di Secrets Cap Cana, Ana Laura Moreno, a bisa cu e hotel tin 457 camber, nan ta junior suite, tambe bungalow y master suite cu ta uno mas grandi y mas luhoso,cu bista dilanti di e beach Juanillos. E ta depende di nan clientenan of publico, nan ta dirigi nan producto.

E hotel ta uno nobo, apenas 3 aña pasa a wordo construi. E tin un concepto hopi habri, fresco y Caribeño. Nan ta situa na Cap Cana cu ta un comunidad priva situa cerca di e aeropuerto na Punta Cana. E hotel ta destina pa clientenan adulto so y un 90% di nan bishitantenan ta bin di Merca. Pero tambe di Europa, specialmente for di Alemania, Francia y Spaña.

Breathless, Punta Cana

Director di Benta di Breathless, Angela Encarnacion, a bisa cu e hotel aki tin dos edificio cu un total di 750 camber. Nan ta maneha un porcentahe di ocupacion di 65% pa 70% durante low season y durante high season di 85% pa 90% for di luna di december te Siman Santo. Mayoria di nan cliente ta bin for di Nort America, kiermen Merca y Canada. Den nan marca Breathless, un 75% di nan bishitantenan ta bin di e region aki. Tambe nan ta ricibi clientenan di Europa y Sur America, pero menos.

E ta destina pa cliente hoben, activo y social cu ta busca mas entretenimento. E ta dirigi mas tanto pa grupo di amigo y despedida di soltero. Pero tambe nan ta realisa boda y esunnan cu kier celebra nan cumpleaño di forma special, e hotel aki ta uno ideal. Nan tin diferente entretenimento, nan ta haci fiesta di scuma cu un DJ yen di animo y bon gusto musical; y night club bon anima.

Si nos ta compara e marca Secrets cu esun di Breathless, esun prome ta mas trankil. E ta mas tradicional y romantico; mas pa pareha y persona un tiki mas adulto. E ta dirigi pa persona adulto sin muchanan. Den cada hotel bo ta haya un tipo di bishitante cu ta bin di diferente mercado. Aunke e Grupo Martinón a inicia na Isla Canarias (Spaña), e presencia di bishitantenan Spaño ta menos compara cu otro bishitantenan cu nan ta ricibi for di Europa.

Na Breathless, tur camber situa den e prome piso tin ‘swim up’, kiermen cada camber aki tin su propio pool mas cerca y mas priva. Esaki lo ta un di e tendencianan di e hotel cu lo bin Aruba. E hotel tin un Xhale Club lounge -nan tin’e den tur nan hotelnan- pero na Secrets nan ta yam’e como Preferred Club. E ta un seccion VIP, unda e cliente ta ricibi un trato mas personalisa, unda entre otro bo por haci check in di forma priva den un lounge y no den e recepcion pa esun cu tin e categoria ‘excel,’ considerando cu nan tin varios categoria di camber.

Now Onyx

Den e Now Onyx e presencia di bishitante Europeo ta importante, ya cu e concepto ta uno mas di famia. Na diferencia di e Secrets y Breathless, e Now Onyx Resorts ta destina pa bishitantenan ya sea soltero, pareha, pero tambe esunnan cu ta bin den nucleo di famia cu muchanan inclui. E ta un hotel cu un concepto contemporaneo dilanti lama di e costa noordwest di Republica Dominicana.

xxx

0 Leyenda potret secrets resort 0

Presidente di e Grupo Martinón, Enrique Martinón y Director Regional comercial di AMResort, Luis Nuñez.

xxx

1 leyenda potret secrets resort 1

Director di Benta di Secrets Royal Beach, Patricia Alvarez

xxxxx

2 leyenda potret secrets resort 2

Director di Benta di Secrets Cap Cana, Ana Laura Moreno

xxxxxx

3 leyenda potret secrets resort 3

Director di Benta di Breathless, Angela Encarnacion