Mr. Edgard Vrolijk lo kier gana confianza di comunidad door di hiba un Parlamento cu ta activo y unda tur Parlamentario ta cumpli cu nan trabao, presentando na ora pa asina por eherce nan funcion. Vrolijk a keda eligi como Presidente di Parlamento pa e Aña Parlamentario nobo cu ta cuminza awe, despues a ricibi 11 voto pro y 10 voto blanco.

Pa e Presidente, e ta similar na haya sosten completo pasobra ningun hende a vota su contra.

Prome Minister Evelyn Wever Croes tambe tabata den Parlamento, den su funcion como Parlamentario, hunto cu coleganan Minister di MEP kendenan tambe ta Parlamentario te ora cu nan tuma retiro pa bira Minister di e Gabinete nobo. Sra. Wever Croes a felicita mr. Vrolijk cu su nombramento, y a cataloga e voto como abrumador.

“Pero cu nos di fraccion di MEP tin tur confianza ta un hecho,” Sra. Wever Croes a bisa, enfatisando cu e Presidente nobo ta un persona husto y firme, kende lo sa di tene ordo den Parlamento . “Edgard Vrolijk a gana confianza di comunidad y e ta bay ta Presidente pa henter Parlamento unda e lo laga tur dos banda haci su trabao.”

Gobierno a nombra Presidente di Parlamento

Sinembargo, miembronan di oposicion a expresa cu e nombramento di mr. Vrolijk tabata regla na bestuurskantoor y tabata anuncia pa Formado Wever Croes siman pasa caba y cu no a duna Parlamentarionan e opcion pa scoge otro hende. Tanto Arthur Dowers di fraccion di AVP, Miguel Mansur di Accion21 y Marisol Lopez Tromp di MAS. “Ta papia di e organo mas halto di pais, ta papia di politica nobo y moderno, y ta eligi Presidente den Conseho di Minister, den partijraad,” Dowers a bisa. “E votonan blanco mester ta un señal cu mester trece cambio den e sistema anticua. Pasobra awor ta Gobierno ta dicidi ken ta bira Presidente di Parlamento y esey no ta e forma pa awendia mas.”

Lider di fraccion di MAS Marisol Tromp tambe ta haya straño cu tabata Prome Minister Evelyn Wever Croes kende a haya ta bon pa anuncia di antemano ken ta bira Presidente di Parlamento. “No ta usual cu ta bisa ken ta bira Presidente di Parlamento prome cu votacion ta tuma luga. Nos no kier ta parti di un stempelparlament,” Lopez Tromp a bisa.

E Parlamentario di oposicion a ilustra e trabao di un Presidente y a expresa su speranza cu berdad Edgard Vrolijk lo tene cuenta cu e imparcialidad cu e mester tin, y trata tur Parlamentario igual. “E Presidente mester ta riba tur partido y no sali na defensa di Gobierno. Gobierno por haci esey su mes.” Lopez Tromp a pidi tambe pa mr. Vrolijk percura cu e proceso pa independisacion di Parlamento keda finalisa pa asina no mester depende di Prome Minister pa finanzas y di Conseho di Minister pa nombramento di personal, pero cu tur esaki ta bin den man di Parlamento mes. “Tene cuenta si cu e voz di pueblo cu ta mas na banda di oposicion cu di coalicion. Pues, pueblo a duna oposicion un voz grandi,” Lopez Tromp a expresa.

Miguel Mansur di Accion21 ta kere cu mester cambia e Kiesverordening, e ley di eleccion pasobra esun actual no ta duna cada voto un representacion. Mansur ta referi specificamente na e restzetels. “Na Hulanda e restzetelnan ta representa menos di 1 porciento. Den e parlamento actual e ta 25 porciento. Un den cada cuater miembro den Parlamento ta representa hende cu no a vota pa nan.” Mansur a menciona e 26.406 voto cu oposicion tin, y e 300 menos di coalicion. Aki a bin un interupcion for di banda di fraccionnan di coalicion y Presidente Vrolijk, cumpliendo su palabra di hala nan atencion pa laga Mansur caba di papia.

“Accion 21 ta para pa integridad, y esey nos a purba salvaguardia contrario na circulo di maldad di otro banda. Nos tin un partido cu ta sinta aki cu dos asiento cu no ta di nan. Cu ta violacion di derechonan democratico di nos pais. Mi ta spera cu un di e decision nan cu ta bay tuma ta e cambio di kiesverordening ta bay cambia pa cada voto conta, pasobra no por ta asina cu un of dos partido cu e minoria di voto ta bin a base di 11 voto di Parlamento y haci comosifuera nan ta representa pueblo.”

Keda riba tema

Di su banda, mr. Geoffrey Wever di Raiz a urgi e Presidente nobo berdad trece cambio den con Parlamento ta funciona. Y specificamente Wever a urgi Vrolijk pa haci uso di reglamento di ordo pa tene e debatenan publico na nivel. Y esaki segun Wever, mester ta door di kita palabra di Parlamentarionan si nan ta desvia di e tema di reunion. “Articulo 37 di Reglamento di Ordo ta bisa cu si un orado ta desvia di e tema di discusion, Presidente di Parlamento por kita palabra di dje.” Ademas Wever kier pa e Presidente nobo haci uso di su poder pa instrui Parlamentarionan cu no ta sigui su instruccion pa bandona sala. “Nos a scoge pa haci bo Presidente. Pues si e Parlamentario ta sali di e topico, nos ta spera di bo persona pa interveni,” Wever a enfatisa. Miguel Mansur di Accion21 a bisa Bon Dia Aruba cu e expresion aki di Geoffrey Wever ta ilustra e tendencia dictatorial di RAIZ mientras cu Marisol Tromp di MAS a bisa cu e ponencia di Wever ta revela su personalidad real.

Un Presidente cu storia inspirador

Finalmente Hendrik Tevreden di MEP a enfatisa cu Accion21 y MAS a perde candidatonan cu a haya voto, y como tal, en realidad, coalicion ta representa mas votado cu coalicion. Pero Tevreden a enfoca mas riba e persona di Edgard Vrolijk. Un hoben cu a lanta di un famia humilde na CobaLodo y a crece bira docente y a logra finalisa su estudio como hurista. E ta kere cu e storia di Edgard Vrolijk ta uno cu ta inspirando y a pidi e Presidente di Parlamento pa sigui inspira futuro generacion door di entre otro mantene contactonan regular cu hobennan na Aruba “Awor ta ora pa mira pa dilanti, a pesar cu tin e mal vibra. Ta ora pa mustra madurez, pakico a scoge nos pa nos ta nan representante. Ban haci esaki den forma civil y madura, den forma corecto,” Tevreden a bisa.

No work no pay

Di su banda e Presidente nobo a bisa cu pueblo a scucha y a confirma cu no Parlamento no por sigui manera cu a haci den e ultimo 36 añanan. “Mi tin mas cu un tarea. Mi mester percura cu ta uni, y trece confianza den Parlamento di parti di comunidad. Reglamento di Ordo ta mas cu dos articulo,” Vrolijk a bisa. El a recorda tur hende cu e mes traha pa amplia e plataforma pa cumpli cu mocionnan, entre otro esun di AVP di 2013 di “’no work, no pay. Pa mi esey ta nifica cu mester ta na trabao 9’or di mainta y haci e trabao haci e trabao sagradamente, sea ta encuentro of reunion publico. Esey pueblo a pidi pe. Mi tin cu implementa peticion.”

Pa Vrolijk, mas cu independisacion di Parlamento, ta e procesonan ta importante pa cumpli cu nan. Tanto e Ministernan nobo como Parlamentarionan mester cumpli cu e procesonan. “E voto blanco pa mi, ta cu no tabatin nada contra mi. Pues mi tin sosten di 21. E organo aki a bira uno bergonzoso den ultimo añanan. Ta e di dos bao di Gobernador y nos mester di trece respet back. Parlamento ta boso 21, y mester duna honor y gradici na esnan pa añanan ta traha aki,” Vrolijk a ilustra.

Despues di a clausura e punto di agenda di eleccion Presidente di Parlamento, a pasa pa e clausura di Aña Parlamentario 2020-2021.

LEAVE A REPLY

Please enter your comment!
Please enter your name here