Siman pasa a keda conoci e ministernan cu lo conforma e gabinete Wever-Croes II na unda den comunidad ta existi expectativanan pa loke tin di haber algun puntonan cu a keda pendiente, specialmente den area di Enseñansa.

Den ocasion aki, Bon Dia Aruba a tuma contacto cu Sindicato di Maestro di Aruba (SIMAR) pa asina duna di conoce kico ta nan expectativanan door di e nombramento di un minister nobo pa area di Enseñansa, esta Endy Croes.

Pa nan como SIMAR, enseñansa di calidad ta hopi importante y esey teniendo en cuenta e derecho di cada trahado y studiante “esey pa nos mester ta na prome luga y esey no ta mara na ningun persona”, Josephine Albertus presidente di e sindicato a expresa.

Nan ta haya importante cu na momento cu nan ta dialogando, esey mester ta na un nivel profesional y cu respet mutuo, y un biaha mas el a menciona cu esaki no ta mara na ni un persona specifico.

Tocante con e formacion a bay, el a trece dilanti cu gobernador a apunta un formado, na unda cu formado a sinta cu masha hopi stakeholder den tur area na Aruba y tambe den enseñansa, mesun cos cu SIMAR, entre otro cu directivanan di scol, cabesantenan di scol, tur loke tabatin relacion cu enseñansa y e ora ey nan ta kere “cu e formado na momento cu el a apunta un minister na un cartera e ta poniendo segun e, e persona corecto cu lo tene cuenta cu tur e reto, tanto actual como esunnan cu lo bini”, Albertus a señala.

Di loke ta trata e situacion cu SKOA, cu manera ta conoci for di basta tempo ta bin presentando un situacion cu werksternan na unda cu habrimento di aña escolar 2021-2022 tambe a wordo afecta, Albertus a indica cu pa SIMAR e situacion aki ta algo cu for di hopi luna ta bezig cune y cu werksternan ta cay bou sindicato SEPPA y no SIMAR.

“Pero nos si ta haya cu ta hopi importante pa trece un solucion riba e incertidumbre aki, pasobra cu enseñansa e ta hopi importante y vooral aworaki cu Covid-19 pa scolnan por tin werksternan, pasobra cu como dunado di trabou e ta un di bo responsabilidadnan pa bo tene en cuenta cu salud, bienestar y siguridad di cada persona laborando den e veld y tambe esun cu ta participa cu ta alumnonan, e higiena ta hopi importante”, Albertus a conta.

Di mesun manera, el a splica cu Departamento di Salud Publico (DVG) a publica un protocol nobo sanitario pa scolnan dia 23 di augustus cu ta stricto riba higiena manera Albertus a comenta, y ta p’esey cu e ta haya importante pa scolnan por cumpli cune, “pero pa por cumpli cu tur e protocolnan aki, e personanan clave ta e werksternan”.

Den e protocol aki ta regarda cu un of mas persona miembro di e institucion educativo mester para responsabel y nan ta obliga pa supervisa e aplicacion di medidanan di higiena cu e protocol aki tin, igualmente pa tur nivel di enseñansa pa medidanan di prevencion tin cu existi e minimo contacto fisico posibel entre personal educativo y mayornan, ta p’esey cu den algun scolnan mayornan no mag di drenta paden di scol, personal di scol ta encarga di ricibi y hiba e muchanan na porta di scol ora nan ta yega of sali na unda un mayor so tin cu hiba y busca e mucha.

Pa muchanan menor di 12 aña por ehemplo, studiantenan di kleuter ta prohibi e uso di tapaboca pero docentenan si mester haci di nan y pa muchanan mayor di 12 su uso si ta obligatorio.

Tocante e werksternan, el a bisa cu esaki no ta un reto facil, segun Albertus a expresa pa motibo cu nan tin hopi luna bezig cu e tema aki pero cu mester tene na cuenta cu Covid-19 te ainda no a bay y mas virus lo bini na unda cu higiena ta importante pa nan lo sigui brinda enseñansa “pasobra cu nos no por habri scol y despues na otro banda nos no por tene na cuenta cu siguridad, bienestar y salud di esunnan laborando, alumnonan y mayornan”, el a bisa.

Albertus a sigura cu nan a yega di sinta un biaha cu SKOA den un reunion hunto cu formado y sindicato SEPPA pa scucha e problematica cu tin, gobierno a nombra un mediador pa bay yuda y nan a duna nan punto di bista riba dje, pero nan como SIMAR no por haci hopi “pasobra e ta afo di nos man, nos no a sigui den e resto di e reunionnan cu tabatin, nos no sa ki solucion tin of kico a wordo apunta pa haci, nos ta sostene nos colega sindical SEPPA pasobra esaki ta un situacion fastioso pero mester bin cu un solucion”, el a finalisa.

LEAVE A REPLY

Please enter your comment!
Please enter your name here