Prome Minister, Evelyn Wever-Croes a prefera di abstene di bay mas den detaye riba e deal relaciona cu prestamo local.

Tampoco e no kier menciona cual ta e nomber di e entidad(nan) local cu lo otorga un prestamo na pais Aruba, entre 136 pa 200 miyon florin, mientras cu e proceso di negociacion cu Hulanda ta andando ainda. El a bisa cu minister di Finanzas, Xiomara Maduro, kende ta mas envolvi den e proceso aki, lo duna mas informacion proximamente.

E hecho cu nos ta fiando placa for di un instancia local cu lo manca nos reserva di divisa y tambe nos lo paga un interes pa halto, e mandatario a bisa cu practicamente nan a sinti forsa pa bay busca prestamo riba mercado local. Mientras cu nos tin di otro banda Hulanda cu ta ofrece nos prestamo na cero interes cumpliendo si cu cierto condicion. Esaki “simplemente pasobra Hulanda a nenga nos 136 miyon,” el a declara.

Premier Wever-Croes a agrega cu si Hulanda no a nenga e suma aki di e tres tranche, gobierno no lo busca e tipo di prestamo aki. Pero mirando e situacion cu nos ta aden, gobierno no por keda warda.

El a referi cu e negociacion cu Hulanda ta tardando. E ta bay hopi slow, y loke nan a logra den dos luna no ta hopi. E credito local aki lo ta destina pa cuminsa paga. Ainda sector comercial no a wordo paga y tampoco esnan cu ta duna servicio na gobierno. Tampoco e dunado di cuido, gobierno no ta pagando nan debe ainda.

Den e caso aki e ta haya cu gobierno no ta fiando placa y scoge pa paga un interes halto, y laga cay un interes hopi abao, por nada. El a argumenta cu e decision aki ta debi pasobra Hulanda a nenga pais Aruba simplemente e dos ultimo lunanan (juli y augustus). Riba mesa di negociacion gobierno ta pidiendo Hulanda pa reconsidera nan decision cu lo por cambia e escenario actual. Pero riba e posibilidad aki e mandatario no tribi di bisa nada ainda.

LEAVE A REPLY

Please enter your comment!
Please enter your name here