Di imagennan di scan di pecho nubia, y pashentnan cu problema pa hala rosea mara na ventilator, nos a wordo condiciona pa pensa di Covid-19 como un malesa respiratorio. Pero no ta djis bay pa pulmon. Hasta den dianan inicial di e pandemia, dokternan a haya cu infeccion di novel coronavirus por afecta otro parti di curpa, incluyendo cerebro, ader y curason.

Datonan di brotenan inicial na China, ciudad di New York y estado di Washington ta sugeri cu entre 20 pa 30 porciento di pashent hospitalisa pa Covid-19 a mustra señal di lesion cardiaco.

CU e pashentnan aki a bira mas malo y a fayece mas frecuentemente cu pashentnan sin complicacion cardiaco no a lanta alarma inmediatamente. Tabata trata di hende cu casonan serio di Covid-19 – suficientemente serio pa termina den hospital. Mayoria di hende cu contrae e virus ta experimenta un spectrum di sintoma menos severo. Mientras un di tres persona nunca ta sinti malo. Pero awo, tin evidencia cu e virus por causa daño na curason di hende cu tabatin sintoma leve of ningun sintoma en absoluto, specialmente si e hendenan aki ta ehercita mientras nan ta infecta.

Luna pasa, na momento cu comisionadonan di liga di e conferencianan universitario Big Ten y Pac-12 a anuncia cu nan lo pospone e temporada di deporte di herfst 2020, un di e factornan mayor cu nan a cita tabata preocupacion pa algo yama ‘myocarditis’. Esey ta loke cardiologonan ta yama ora e murayanan muscular di curason bira inflama, debilitando e organo y haciendo mas dificil pa e pomp sanger. No ta un condicion recien descubri, y e ta aparece inusualmente, pero ora e aparece, hopi biaha e ta impulsa pa un infeccion. Virus, bacteria y hasta amoeba invasor, gist, y bichi tur a mustra di por caus’e.

Loke nan tin den comun ta cu nan ta pusha e sistema immuun di e curpa den modo di atake, conduciendo na inflamacion. Si un persona ta descansa mientras nan ta malo y durante recuperacion, mayoria di biaha e inflamacion ta baha y musculo di curason ta cura di su mes. Pero actividad fuerte mientras e curason ta debil por causa inflamacion den pia, mareo, falta di rosea y – den casonan serio – ritmo cardiaco iregular, atake di curason, y morto subito.

E situacionnan mas extremo aki ta mira mas frecuentemente den atletanan competitivo. Ta pa esaki cu cardiologonan ta urgiendo precaucion tocante e retorno na sport memey di pandemia. Apenas luna pasa, hungado di basketball di estado di Florida, Michael Ojo a fayece di aparente complicacion cardiaco despues di hunga den un liga profesional na Serbia, poco despues cu e atleta di 27 aña di edad a recupera di Covid-19.

Pa preveni e pandemia di conduci na lesionnan similarmente tragico di curason entre atletanan studiante, dokternan na Ohio State University a desaroya un protocol nobo, segun Saurabh Rajpal, un cardiologo y profesor assistent di medicina interno na OSU. E protocol ta rekeri cualkier hungado diagnostica cu Covid-19 ricibi un examinacion clinico, test di sanger, electrocardiograma y MRI – un tecnologia caro y poco usa – prome cu bolbe hunga.

Entre juni y augustus, 26 muhe y homber di e teamnan di futbol, futbol Mericano, lacrosse, basketball y track di e universidad a presenta pa e screening despues di recupera di Covid-19. MRI a mustra inflamacion di e musculo di curason – un señal di myocarditis – den cuatro di nan. Di e cuatro, dos nunca a experimenta sintoma di Covid-19. E serie di caso a keda reporta diabierna den e journal JAMA Cardiology.

Pasobra no a saca potret di e curason di e atletanan prome cu infeccion di Covid-19, y pasobra no a compara nan cu control – esta hende similar cu no a contrae e virus – ta imposibel pa bisa sigur si e virus a causa e daño observa. Pero Rajpal, un di e co-autornan di e estudio, ta bisa cu otro infeccionnan viral ta causa myocarditis, y SARS-CoV-2 no ta diferente. “Ta importante pa hende sa cu Covid-19 por afecta e curason”, el a bisa.

Y e problemanan aki no ta afecta atleta so. Un estudio observacional mas grandi conduci na Alemania e berano aki a sigui 100 pashent di Covid-19, no atletanan, y a haya inflamacion di curason y otro abnormalidad cardiaco den 78 di nan. Segun Eric Topol, un cardiologo basa na Merca den contacto cu e autornan, 12 di e personanan aki no tabatin ningun sintoma di Covid-19 en absoluto. Y mientras despues a coregi e estudio pa erornan estadistico, su autornan a confirma cu e conclusionnan mayor ta keda: Hasta un malesa leve cu Covid-19 por daña e curason.

Exactamente con hopi y con frecuentemente, ningun persona sa ainda, segun Topol, kende ta dirigi e Scripps Research Translational Institute na La Jolla, California. “Esey ta un frontera no explora”, el a bisa. E evidencia ainda ta principalmente di anecdota. E lo kier mira gobierno y otro patrocinadornan di investigacion pone placa un banda pa studia mas sistematicamente gruponan grandi di hende pa mira kico ta pasa cu nan curason despues cu nan haya Covid-19. Pero te awo, e no ta parce di ta un prioridad. Talbes pasobra cantidad di otro virus tambe ta causa myocarditis, Topol ta specula. Pero e diferencia aki – y loke mester ta dunando impulso na un estudio mas urgente, den su opinion – ta cu mayoria di virus no ta infecta decenas di miyones di hende den un periodo di seis luna.

“Na Merca actualmente, ta calcula cu mas di 50 miyon persona a infecta cu e virus aki”, el a bisa. Hasta si apenas 1 porciento di Mericano experimenta algun tipo di problema cardiaco, esey toch ta mey miyon persona. “Esey ta loke hende no ta mira aki”, Topol ta bisa. “No ta tuma hopi incidencia ora cu e virus aki a pasa den asina hopi hende pa e bira un peso enorme. P’esey nos mester gara esaki y compronde esaki lo mas pronto posibel.”

Cientificonan tampoco sa ainda si e inflamacion observa den pashent di Covid-19 ta daño colateral di e respuesta immuun di e curpa, of si e virus directamente ta infectando tejido di curason. Celnan di musculo cardiaco ta expresa ACE2, e porta molecular cu coronavirus ta usa pa invadi host nobo. Y estudionan di autopsia a descubri e virus den curason di pashent fayecido di Covid-19. (Maske, notablemente, no e sorto di celnan immuun asocia cu un respuesta inflamatorio). E luna aki, cientificonan na Gladstone Institutes a haya cu e virus, ora ta agreg’e na celnan cardiaco humano den un petri dish, a desgarra e fibranan largo di musculo cu ta mantene e pomp di curason.
Bruce Conklin, un co-autor di e estudio, a bisa STAT cu e ‘masacre’ tabata manera algo cu e nunca a mira cu otro malesa. Pero mester mas investigacion pa compronde miho si esaki ta representativo di loke actualmente ta pasando paden di curpa di hende infecta cu Covid-19.

E necesidad ta particularmente critico, pasobra hopi hende cu ta infecta cu coronavirus no sa cu nan ta infecta. Y nan por haci cosnan – manera ehercicio – sin sa, cu por daña nan curason durante of inmediatamente despues di nan infeccion. Atletanan amateur specialmente, manera coredonan, triatleta y otronan cu ta registra cantidad di kilometer pero no tin acceso na screening cardiaco regular, por no ta na altura di e riesgonan pa tuma decision tocante e seguridad di nan regimen di training.

Ta p’esey Rajpal ta sugeri pa pone atencion extra na bo curpa si bo bay core, core bicicleta of otro actividad deportivo, specialmente si tin algun sospecha di malesa. “Si bo experimenta algun sintoma sospechoso – dolor di pecho, falta di rosea of palpitacion di curason – tuma contact cu bo dokter”, el a bisa. Y si bo a test positivo pa Covid-19, e ta recomenda pa tuma algun siman off prome cu bolbe gradualmente na e nivel di training cu tabatin anteriormente.

Na OSU, e atletanan cu a mustra señal di myocarditis den nan MRI a wordo poni den tres luna di descanso obligatorio. Na fin di esey, lo scan nan di nobo pa sigura cu e inflamacion a stop, y solamente despues di esey, segun Rajpal, nan lo ricibi aprobacion pa hunga.

 

LEAVE A REPLY

Please enter your comment!
Please enter your name here