Aruba ta ofreciendo estadia na hotel cu descuento pa residentenan Mericano, a traves di e programa ‘One Happy Workation’ cu ta permiti trahadonan remoto biba y traha na Aruba pa hasta 90 dia.

E programa ta ofrece un coleccion di deal y ofertanan di descuento na un variedad di acomodacion local. Segun website di e programa, ta habri pa cualkier persona cu un paspoort Mericano valido, sin rekeri un visa ni documentonan special.

Maske no ta descurasha biahe no-esencial mas, CDC ta adverti cu ‘biahe ta aumenta bo chens di contrae y transmiti Covid-10’.

Mientras cu e acomodacion tur ta inclui Wi-Fi gratis, segun website di e programa, dependiendo na cua resort, hotel of cas di huur ta keda, tambe por haya cuminda all-inclusive, of descuentonan pa atraccionnan popular, evento of experiencianan, for di les di cushina te na tratamento den spa.

Aruba a habri back pa turista di cierto paisnan na juni, y ta permitiendo bishitantenan di mas paisnan, incluyendo Merca, desde e tempo ey.

Pa participa den e programa, e bishitantenan mester reserva un di e paketenan disponibel pa sikiera un siman, y no mas di 90 dia, maske e website ta bisa cu por extende e duracion maximo den futuro.

Mientras trahadonan remoto mester ta emplea pa un compania no-local of traha riba nan mes, e website ta conseha cu ‘trabao no ta obligatorio’ y cu por ‘pasa bo estadia con cu bo kier’. E unico stipulacion segun e website ta cu bishitantenan no por traha pa un persona of compania Arubiano, ya cu esey si lo rekeri un permiso di trabao of negoshi.

Ademas tin rekisitonan relaciona cu pandemia di Covid-19 pa tur bishitante. Tur bishitante riba 14 aña di edad mester presenta un test negativo di Covid-19 na su yegada na e isla, of haci un test na momento di aterisa. Pa bishitantenan di cierto estado Mericano, un test prome cu yegada como tambe un na momento di aterisa ta rekeri. Bishitantenan lo mester bay den cuarentena na nan acomodacion te cu nan obtene resultado di nan test, cual Aruba Tourism Authority (ATA) ta bisa usualmente lo dura entre seis pa ocho ora.

Tur bishitante tambe mester cumpra un Aruba Visitors Insurance, cual tin meta pa cubri cualkier costo relaciona cu Covid-19 cu por incuri durante nan estadia.

Ademas ta rekeri bisti tapaboca den tur transporte publico y espacionan publico cera, y ‘fuertemente curasha’ ora no por tene distancia social.

Mas informacion via e link: https://www.aruba.com/us/one-happy-workation