Un app mobil nobo mester a yuda oficialnan democrata pa compila informacion rapidamente pa alrededor di 1,700 sitio di caucus na Iowa. Na luga di esey, un ‘problema cu codigo’ den e app ta culpabel pa atraso cu a laga e resultadonan desconoci e mainta despues di e prome concurso di nominacion presidencial den e pais.
Problema cu e app a causa confusion dialuna, y algun organisado di caucus tabata forsa pa nota resultadonan pa e partido estatal manualmente, introduciendo retraso y e posibilidad di eror humano. Preisdente di Partido Democrata pa Iowa, Troy Price a bisa cu e retraso no tabata resultado di un violacion y cu sistemanan di e partido ta sigur.
El a bisa cu mientras e app tabata compila data precisamente, tabata reporta unicamente data parcial, pa motibo di un problema cu codigo den e sistema di reporte.
E partido a bisa cu ta spera di revela resultadonan no oficial despues di verifica manualmente su data cu backup di papel. A diferencia di eleccion na november y primarionan estatal administra pa oficialnan di eleccion local y estatal, e caucus na Iowa tabata administra pa e Partido Democrata na Iowa.
E partido no a bisa ken a desaroya e app pa reporta resultadonan di caucus, pero un vocero pa un di e campañanan presidencial Democrata a confirma na AP cu e compania yama Shadow Inc. a crea e app di reporte pa Iowa caucus y e app pa Nevada tambe.
