E problema di huma di substancianan acido cu ta causa molester na e waf na Barcadera no ta soluciona completo.
Den un conferencia di prensa WEB y minister Xiomara Ruiz-Maduro a splica con ta soluciona e problema riba termino cortico, mediano y lagro. Nan lo bay uza un otro azeta (HFO) cu ta baha e nivel di sulfur (zwavel, SO2) den e huma, asina WEB a presenta como solucion riba man.
Sinembaro tin mas substancia acido den e huma cu e planta ta produci. Manera NOx cu ta keda sali for di e pipanan di WEB ora lo cuminsa uza e azeta cu menos sulfur. Riba pregunta di Bon Dia Aruba con lo preveni esaki, e contesta ta cu riba termino cortico ni mediano por soluciona esaki. Ta ora aki 4 aña WEB lo uza solamente gas natural pa produci awa y coriente, esaki no ta un problema mas, como cu no tin huma mas cu ta sali, asina WEB ta contesta.
Bon Dia Aruba tambe a puntra dicon WEB no a inverti den adaptacion di nan planta, pone filter/scrubber pa asina huma limpi sali. E compania ta contesta cu nan a opta pa inverti den energianan alternativa manera energia di biento y solar pa baha e cantidad di huma sali. Inversionnan grandi y cu nan no por a inverti pareu den adaptacion di nan planta.
Na otro paisnan mas desaroyo plantanan y tambe vehiculonan a adapta pa hopi añanan caba. Motibo principal ta cu gobiernonan a bin cu ley pa prohibi sea limita e substancianan dañino den huma. Na Aruba no tin ley specificamento cu ta regla emison den aire. Sinembargo si tin e ley cu ta regla e molester cu companianan por causa (Hinderverordening). Con esaki ta regla pa WEB, no ta conoci.
Minister Ruiz-Maduro a comenta cu no por compra Aruba cu Europa unda por haci inversionnan grandi y caro asina mas facil. El a defende WEB su strategia pa inverti den energia alternativa como solucion pa baha e cantidad di huma.
