22Mrt,JO, ProblemaMarlontje.jpg

Siman pasa Bon Dia Aruba a sinta cu un grupo di persona pa papia tocante e bunita gesto cu a wordo haci pa yuda Marlontje bay Hulanda y cuminsa cu un programa di rehabilitacion.  Un poco dia despues, diferente acusacionnan y problemanan a cuminsa escala entre e grupo cu ta yudando Marlontje. Bon Dia a comunica cu Astried Vries kende ta splica cu na principio, e la traha un video caminda e la entrevista Marlon y papia un tiki tocante su bida y e video aki a wordo mira mas cu  19,000 biaha. Despues di e video aki, tin hende cu a sigui haci bofon di Marlon y tin diferente grupo cu a bini hunto pa haci algo pa yuda Marlon, y esaki segun Sra.Vries a ponele sinti cu su programa tin balor. 

Sinembargo, e proyecto aki pa yuda Marlon ta un esfuerso di entre otro Javier Ras, Sue Ellen Tromp y otro amigonan y compañeronan cu a bini hunto. E unico palabracion cu tabata tin cu Sra.Vries segun Javier Ras ta conta Bon Dia, ta cu e mester a djis yuda cu sponsor pa haya paña y otro detayenan pa facilita e biahe di Marlon.

Kico a bay robes?
Segun Javier Ras, tur e problemanan a cuminsa despues cu tabata tin un confrontacion entre Sra.Vries y un otro persona cu tambe a ofrece pa yuda Marlon cu yama Roxcey Jansen.  Tabata asina cu en berdad Sra.Vries a yuda busca sponsor cu Trash By Ronchi segun Sr. Ras pa yuda Marlon cu paña y cualkier otro rekisito pa dia cu e bay Hulanda. Esaki tambe tabata e ultimo fase di e servicionan di Sra.Vries pa e proyecto aki. Sra.Vries ta insisti cu e kier a djis sostene locual Javier Ras y su team a inicia cu e proyecto ”Un Dia Den Felicidad Di Marlontje” y su intencion tabata pa solamente aporta na unda cu e tabata por y no tuma credito completo di e proyecto.

E dia cu mester a bay pas e paña cerca Ronchi, un discusion a escala entre Sra. Vries cu Roxcey Jansen pa motibo cu Marlon no tabata kier a wordo filma y Sra. Vries a keda insisti pa filma Marlon na Ronchi mientras e ta pas su pañanan.
E motibo pakico Sra. Vries kier filma ta pasobra asina e ta traha y e kier ”mustra e pueblo ta na unda e placa di donacion ta bayendo”, e ta splica Bon Dia.

 Roxcey Jansen a mustra Bon Dia un grabacion di telefon caminda bo ta scucha Marlon bon cla ta declara cu e no ta gusta wordo filma y ta prefera di no wordo filma mes mas pa uza manera promocion. Despues di esaki un lastramento di otro y acusacionnan a cuminsa riba Facebook caminda cu hasta Javier Ras su nomber a wordo menciona varios biaha. Javier Ras ta bisa cu e no ta reacciona riba ningun post of comentario riba Facebook pasobra si algun hende tin algo di bisa, nan por bin cerca dje y comunica esaki cune personal pa motibo cu e mes ta prefera esaki.

Pa locual ta Marlontje, segun Roxcey Jansen, Rode Kruis Aruba a ofrece Marlon pa pasa 3  dia di Detox cerca nan pa e cuminsa prepara pa bula bay Hulanda, sinembargo, Marlon mes no kier haci esaki y Jansen ta pensa cu ta pa motibo di manipulacion na banda di Sra.Vries. Marlon ta drumiendo riba caya ainda y segun Jansen ta splica Bon Dia, tin un persona cu kier tuma Marlon caba na su cas pa yuda su persona prepara pero no ta conoci ainda si esaki ta bay pasa.  Javier Ras ta sigui splica Bon Dia cu tur cos ta cla pa Marlon bay Hulanda y e unico cos cu falta pa confirma ta e nomber di e persona cu ta bay ricibi Marlon na aeropuerto ora cu e yega.
Fuera di tur e problemanan y acusacionnan cu ta bayendo rond, Sra. Vries ta disculpa su mes y sinembargo ta duna su elogio na tur esnan cu ta yudando Marlon y ta desea pa tur cos bay bon cun’e na Hulanda. 

LEAVE A REPLY

Please enter your comment!
Please enter your name here