Venezolanonan na Aruba

Despues cu a bira conoci e victoria di oposicion den eleccion di diadomingo ultimo na Venezuela, minister Otmar Oduber a declara na Bon Dia Aruba cu “tur proceso politico ta trece cambio….”  

E mandatario a indica cu den e cambio aki nan ta mira posibilidad sigur pa por combersa y estrecha e lasonan cu pa hopi aña ta existi caba entre Aruba y Venezuela.
E no ta kere cu mester yega na e punto di introduci un visa pa controla e fluho di Venezolano cu no ta bin specificamente pa haci turismo na Aruba. Sinembargo cualkier cambio riba e tereno aki mester tuma luga den convenio entre e dos paisnan, asina e mandatario a declara na e matutino aki. Minister Oduber a enfatisa cu pa motibo economico Venezuela ta keda importante pa Aruba. No solamente pa turismo –segun e mandatario- sino pa asunto di consulta medico y tambe como destinacion turistico, ya cu tin hopi Arubiano cu ta gusta bishita Venezuela.

Mercado Venezolano
Como minister di turismo e ta kere cu e mercado Venezolano ta keda uno hopi importante. El a reitera cu tin hopi Venezolano cu tin e poder economico ainda pa biaha y bin Aruba. Nan ta Venezolanonan cu tin e visa Mericano tambe.
“Ami lo kier keda wak Venezuela como mercado importante pa nos pasobra e ta keda denter di e grupo cu un gran porcentahe di dje ta bin ainda y ta gasta hopi placa na Aruba”, el a bisa. Minister di Turismo a laga sa cu  semper pa historia Venezuela tabata ta e di dos mercado principal di Aruba pa loke ta trata bishitantenan cu ta gasta riba nos isla.
Igualmente el a señala cu nan ta wak e mercado di Colombia cu awor no mester di visa pa bin Aruba como un diversificacion y alternativa pa nos turismo considerando e paisnan cu ta pasado den dificultad economico manera Brasil, Argentina y otro paisnan mas. E apertura cu Colombia lo por yuda tapa e desbentaha cu nos industria turistico tin den e mercadonan aki pa motibonan economico, financiero di e propio paisnan menciona.

Visa special
Tin henter un proceso cu ta andando pa introduci un instrumento di control di inmigracion  cu no necesariamente mester ta un visa pa e bishitantenan Venezolano cu ta bin Aruba.
Minister Oduber a referi na e debate cu tabatin recientemente pa bin cu un visa pa e Venezolanonan. E discusion aki cu gobierno di Aruba a presenta ta esun di trece un “visa special”.  El a splica cu ora ta referi na un  “visa special” kiermen cu e no ta un visa full cera manera normalmente lo tin, sino cu lo bin cu cierto condicionnan mara na dje. Un condicion lo ta pa ehempel si un persona di Venezuela cu tin un visa Mericano of un visa di Schengen lo por bishita Aruba sin problema. Tambe esunnan cu a yega di bishita nos isla un cierto cantidad di bes, no mester exigi e visa aki pa nan. Esaki tabata un di e puntonan cu a wordo discuti den henter e proceso cu ta andando den e momento aki di e cantidad di Venezolano cu ta bishita Aruba.        

 

LEAVE A REPLY

Please enter your comment!
Please enter your name here