Productornan agrario Argentino cu protesta y activdad dilanti Congreso; Kier democratisacion di terenonan pa cultivo di cuminda pa tur Argentino

Union di Trahadonan di Tera di Argentina, UTT a tene un protesta di 48 ora dilanti di e Congreso Nacional pa demanda legisladornan pa pasa e ley Acceso na Tereno.

Fuentenan di UTT a anuncia tambe un cantidad di actividad cu ta programa riba e plaza, for di mobilisacion te tayernan, ademas di benta di productonan agrario via medio digital.

Adicionalmente a celebra e Dia di Primavera ayera cu un ‘florazo,’ y a celebra e actividadnan cu un festival di arte na aire liber.

UTT ta insisti cu na Argentina, unicamente 13 porciento di e terenonan ta den man di productornan chikito, cu ta produci mas di 60 porciento di tur e cuminda cu ta comercialisa domesticamente. A cambio, un porciento di tur empresa agrario ta controla 36 porciento di e terenonan pa cultivo.

“E ley cu nos ta demanda, ta propone un sistema di credito barata pa e sector rural, pa asina famianan cu ta produci y no tin empresanan grandi, por haya acceso na terenonan pa percura pa produccion sostenibel y biba den viviendanan decente,” Lucas Tedesco, Presidente di UTT a bisa.

E Ley a bay Parlamento caba y for di Mei e comision di Agricultura y Asuntonan Legal di e Camara di Diputado a trat’e. Pero no a yega na consenso. E ley keda presenta casi un aña prome. Ta di tres intent pa pasa un ley asina.

“Awe mas cu nunca, ciudadanonan di Argentina mester di medidanan concreto pa por yega na cuminda saludabel pa medio di prijsnan husto, y pa esey ta posibel, mester baha y controla e prijs di e pakete basico di cuminda,” segun voceru di UTT, Rosalía Pellegrini. “Un di e medidanan concreto cu ta propone ta acceso na terenonan pa medio di e ley, pa asina famianan cu ta productor por produci cuminda cu ta mas economico y saludabel pa tur Argentino.”

Agustín Suárez, tambe di UTT a bisa cu e modelo di empresa agrario ta representa un campo cu no ta duna cuminda, no ta enfoca riba e hamber di e Argentino, pero si ta genera rikesa enorme pa medio di exportacion. “Aunke esey tambe ta necesario, nos mester promove otro modelo cu ta percura pa cuminda pa Argentinonan.. Nos ta mioles di agricultor, cooperativanan agrario y productornan chikito y mediano cu ta propone un modelo sostenibel, pa medio di agro-ecologia y democratisacion di e terenonan,” Suárez a enfatisa.