Programacion di examen cu Webcam acusa di discriminacion pa motibo cu no a reconoce studiante di color scur

(NLTimes) – Un studiante di VU University Amsterdam a entrega un keho na Netherlands Institute for Human Rights na Utrecht riba diabierna pa motibo cu e programacion pa preveni cu studiantenan lo por kijk af no a funciona pa motibo di e color di su cuero.

Segun Racism and Technology Center na Amsterdam, e no por ta e unico persona. Miles di studiantenan di tono di cuero scur posiblemente a sufri esaki tambe, cuasando extra stress, e organisacion a bisa.

Durante e crisis di coronavirus, studiantenan mester a tuma varios examen na cas. Universidadnan a haci uso di programacionnan pa preveni fraude. Entre otro, e programacion mester reconoce e cara di e studiante. Sinembargo e no por a reconoce e studiante en cuestion, Robin Pocornie. Ta te ora cu el a pone extra lus riba su cara, e programacion yama Proctorio a reconoce su persona. Y mientrastanto, e tabata sinti frustracion y stress lidiando cu esaki. El a sinti su mes victima di discriminacion.

“E sistema mester ta traha di un manera cu ta sigura cu no tin fraude, pero awo ta resulta cu e sistema aki mes ta inhusto,” Hans de Zwart di Racism and Technology Center a declara. Segun Racism and Technology Center, e ta algo cnoci pa hopi tempo caba cu e sistemanan cu ta depende riba e reconocimento di cara di personanan y/of usuarionan ta trece problema ora ta trata di personanan di un color di cuero scur, y esaki ciertamente ta e caso cu Proctorio. Sinembargo, apesar di esaki varios universidad te ainda ta haci uso di e programacion aki, e centro a declara.

Segun De Zwart, universidadnan tambe por revisa e candidatonan di otro manera, simplemente via conexion di video cu un ser humano. E metodo aki a ser usa den pasado caba cual ta haci cu e ta comproba cu e metodo aki ta funciona. Pocornie, ken no ta satisfecho cu e manera cu VU a maneha su keho, ta spera cu pa medio di tuma contacto cu Netherlands Insitute for Human Rights lo manda un mensahe cla na tur institucionnan publico cu nan tin un deber y responsabilidad pa cu e pueblo, y esaki ta encera e responsabilidad di haci uso di sistemanan cu no ta discrimina, cual nan mester investiga y revisa prome cu nan haci uso di e tipo di tecnologia aki.