(NLTimes) – Hulanda su decision di laga scolnan prohibi smartphone na scol a resulta den mas socialisacion entre studiantenan, menos distraccion y menos bullying, segun Radboud University Nijmegen a haya den su prome estudio tocante e politica estricto tocante telefon cu a drenta efecto dia 1 di januari.
Di otro banda, e studiantenan ta reporta cu nan ta encontra mas problema practico awo cu nan no tin telefon den man mas, De Volkskrant a reporta.
Radboud University su investigadornan a haci un encuesta cu alrededor di mil studiante di scol prome cu e prohibicion y 3 luna despues. Mas cu mita di e studiantenan cu a participa a bisa cu awo nan ta papia cu nan amistadnan y demas compañero den klas mas.
40 porciento a bisa cu awo nan ta disfruta pauze mas. “Ora cu e politica no a keda implementa, tur hende tabata den un screen y no tabatin hopi hende ta papia cu otro,” un studiante a bisa.
21 porciento a bisa cu awo nan ta menos distrai den klas. “Menos di loke mi a premira,” lider di e investigacion Loes Pouwels a bisa, pero toch un efecto notabel. “Un splicacion posibel pa esaki ta cu awo e studiantenan ta haya distraccionnan mesun facil riba nan laptop.”
Studiantenan tambe a reporta menos comportamento di bullying, segun Pouwels. “Haci obligatorio pa warda bo telefon ta un medida relativamente chikito pa docentenan y aparentemente tin un efecto significante.”
