Diabierna atardi, gerencia di FCCA y sindicato FTA a firma nan prome contracto colectivo (CAO) di tres aña pa tur trahadonan. Aunke tabata existi caba un areglo of condicion di trabou, mayoria di trabou a desea pa hinca e areglo aki den un CAO oficial.

FTA
Presidente di FTA, Hubert Dirkzs a bisa cu e fundacion aki cu ta percura pa bin cu vivienda popular, cual ta mas importante pa pais Aruba. Despues di un proceso di negociacion basta largo y di debate, finalmente nan a pone e base pa sigui desaroya di un forma conhunto. Ya cu FCCA ta importante tanto pa e comunidad, pa e trahadonan tur y logicamente pa e miembronan di FTA cu ta alrededor di 33 trahado.

Aunke FTA ya caba tabata den FCCA, pero despues di basta aña, finalmente na a logra concretisa e CAO. P’esey e sindicalista Dirksz a gradici tur esunnan cu a persevera bastante tempo, ya cu tabata un trabou duro a wordo haci. E ta kere cu e meta cu a inspira nan for di inicio no ta cambia y ‘conhuntamente nos ta sigui lucha pa FCCA.’ Tambe e sindicalista a laga sa cu un grupo di trahado contento sigur tin e tendencia cu nan por produci y haci lo maximo di nan parti.

Abogado di FTA, Hose Figaroa kende a forma parti di e team negociado a bisa cu den e proceso aki hasta nan a bin cu accion, pero nan a logra surpasa e retonan aki. Awor ambos partido –segun abogado Figaroa- por conta cu un documento, aunke FCCA tin hopi aña sindicalisa. Pero tur e tempo ey areglonan tabata wordo hinca den un condicion di trabou of areglo legal.

Sinembargo e tipo di documento aki no ta di e tempo aki mas. P’esey nan a lucha pa bay den un acuerdo colectivo di trabou of CAO cu ta beneficia tur trahado di FCCA. Unda ambos parti ta yega na acuerdonan concreto riba con e beneficionan ta hinca den otro. El a cualifica como un base di un colaboracion di hopi aña mas entre sindicato FTA su miembronan y FTA.

FCCA
Director di FCCA, Edwin Tromp a considera importante un tipo di negociacion manera esunnan cu nan a hiba pa concretisa e CAO aki. Tromp a bisa cu tin biaha ta wordo bisa cu e negociacion no a bay facil of cu e tabata dificil. Sinembargo e ta haya cu ta dificil pa por defini den un negociacion kico ta dificil of no. Ya cu e ta considera cu un negociacion ta un bista global, unda nan mester por pensa mas habri y no riba bo so.

El a laga sa cu e CAO a bira un formalidad riba beneficionan cu e trahadonan tabata gosa di dje caba pa medio di nan areglo di trabou. Solamente ta e forma con bo ta deal cune y awor FTA ta un partner oficial pa negosha condicion di trabou. Pues no solamente e trahadonan ta wak aumento di salario, un basico cu a bira miho, sino otro beneficionan. “No tin hopi cos cu a cambia pasobra,” el a bisa. Tromp a remarca cu FCCA tabatin su structura for di hopi aña caba, entre otro, con nan ta evalua trahado, con nan ta haya nan aumentonan, y si tin promocion con esaki ta sosode, etc..

Tromp a gradici tur esunnan cu a traha den e CAO y el a expresa su palabra di danki pa nan pasenshi. “Obviamente nos mester ta contento di por a yega na otro,” el a bisa.

 

LEAVE A REPLY

Please enter your comment!
Please enter your name here