Aruparking

 

Minister Otmar Oduber encarga cu transporte a pidi Arubus / Aruparking pa no mas tarda cu fin di februari otro aña pa tin henter e sistema electronico pa uza Aruparking via telefon ta cla. Unda cu bo no mester carchi ni placa mas. Pues via smartphone ta pone suma di placa y por añadi na esaki y e ta notifica bo ora cu bo ora ta cabando etc.

Siman pasa e mandatario a sinta cu Camara di Comercio. A reuni cu nan pa di tres biaha segun e ta splica, dos biaha anterior cu Arubus y riba nan invitacion sr. Oduber tambe mester tabata presente.

“Nos a reuni cu comerciantenan y mi mester bisa cu tin hopi sugerencia positivo cu a bin dilanti. Tin algun sugerencia cu ya caba a wordo adopta door di Aruparking cu ta bay wordo ehecuta pronto. Cual mi ta kere ta mustra e dinamismo cu tin.” Tin varios persona cu tin preocupacionnan valido. Tin negoshinan cu a sinti un consecuencia negativo cu tambe valido, pero tambe tin negoshinan cu a sinti e aspecto positivo tambe, unda cu nan ta bisa cu nan benta a subi, sr. Oduber ta bisa.

Mester ta beneficia tur partido
“Pero naturalmente mester percura pa sostene esunnan cu kisas a sinti e efecto negativo. Nos tabatin un reunion cu nan unda cu diferente punto a bin dilanti. Mi ta contento cu a wordo bisa cu nan ta sostene Aruparking. Solamente cu mester mira con por traha mas cu otro pasobra e meta t’ey pa e bira un “win-win” situacion pa tur partido envolvi. Aruparking su existencia no ta sigui si no tin cliente pa cumpra den caya grandi of den centro di ciudad. Tur dos mester di e cliente y mester traha pa por yega na e metanan,” E mandatario a bisa.

Aumento di uzo
“Pa un bista te cu aworaki, tur siman sin excepcion, pa e ultimo 7 of 8 simannan cu Aruparking ta den funcion ta mira cu e uzo ta keda aumenta y a aumenta drasticamente. Hopi mas hende ta bin centro di ciudad.” Aworaki segun ministerOduber nan mester bay percura cu e ideanan cu a bin dilanti for di e comerciantenan por logra sostene otro pa di e forma aki, hendenan caba di custuma completamente cu e sistema.

“No ta na Aruba nos a inventa e sistema aki, ni minister y ni gobierno. E ta un formula cu ta existi y cu ta funciona tur parti di mundo. Tur parti cu tin un desaroyo positivo tin parkeer y e ta tuma un tempo mescos cu a bisa na diferente ocasion, cu e ta tuma entre 3 pa 6 luna pa hende custuma.”

Segun e mandatario ya ta mira e desaroyo aki den e usuarionan aworaki ora cu nan ta mira con

eficiente y facil e ta pa yega den centro di ciudad. Y aworaki mester mira cu den e periodo ey por duna e sosten mas cu ta posibel cu ta via Aruba Tourism Authority (ATA) y otro mecanismo nan pa despues di e 6 lunanan aki cu ta e momento critico cu den futuro mescos cu tur parti mundo hendenan ta bira orguyoso di e sistema cu nan tin di parkeer, minister Oduber a termina bisando.

LEAVE A REPLY

Please enter your comment!
Please enter your name here