(CuraçaoChronicle) – St. Maarten ta den apuro y no por pone un paro na su economia door di lockdown. Residentenan mester ta responsabel pa combati transmision di Covid-19. Esaki tabata e mensahe cla di prome minister Silveria Jacobs durante e conferencia di prensa di Conseho di Minister diaranson ultimo.
El a bisa cu e pais a acumula debe na total di NAf. 220 miyon como resultado di Covid-19 y economia di e pais no ta cerca di unda tabata prome cu e pandemia. “Aña pasa tempo cu nos a papia di fayecido, no tabatin vacunacion y nos no tabata sa cu kico nos tabata lidiando, y pues, si, nos mester a bay den lockdown. Y cantidad di hende ta puntra, ‘oh, e cantidad di caso ta asina halto, pakico nos no ta lockdown?’ Nos no ta na e mesun luga unda nos tabata aña pasa. Nos tin algun bentaha. Nos sa cu kico nos ta lidiando; nos sa kico nos mester haci pa keda safe y e ta keda na nos”, Jacobs a bisa.
“Cantidad di hende ainda ta papiando di derecho y libertad. Ami lo pensa cu e derecho pa biba en general mester ta e derecho mas halto di tur. Y mientras gobierno ta continua para tras di e vacuna como e miho manera pa combati malesa serio como tambe morto, nos no a hacie obligatorio, sino ta confiando cu pueblo di St. Maarten ta bay tuma nan bida y bida di nan famia den consideracion, como tambe nos sustento como pais. Simplemente nos no por afford pa stop nos economia. Nos ta den apuro.”
St. Maarten ainda no ta financieramente unda tabata prome cu Covid-19 na 2019. E Plan di Estimulo y Alivio di St. Maarten (SSRP), cu ta sosteniendo cantidad di negoshi pa retene nan trahadonan, lo termina na september a menos cu despues di evaluacion St. Maarten por yega na otro acuerdo.
“Nos a ricibi e di seis tranche di sosten di likides – e NAf 48 miyon, pero no laga niun hende pensa cu nos ta bon awo. Nos a ricibi e di cinco tranche pa fin di segundo kwartaal pues e placa tabata gasta prome cu nos a ricibie. Awo e fondonan cu a rcibi ta pa asisti nos pa sobrevivi e lunanan di juli, augustus y september – e tercer kwartaal”, el a finalisa.
