(DiarioLibre) – Autoridadnan Dominicano a dicidi cu ta necesario un accion di vacunacion ‘cas pa cas’ na varios parti di e pais. E accion ta dirigi especialmente riba e personanan cu pa algun motibo no a vacuna ainda. Segun ministro di Salud Publico, Daniel Rivera, e resultadonan di e jornada diadomingo pasa tabata satisfactorio, cu un acogida positivo di parti di e poblacion cu a haya bishita.
E campaña di cas pa cas ta den cuadro di apoyo na e Plan Nacional di Vacunacion, pa por acelera e cantidad diario di persona cu ta vacuna. Rivera a bisa cu lo bay enfoca riba e zonanan cu mas tanto caso positivo manera Maria Trinidad Sanchez y Duarte.
Encuanto ciere di algun punto, el a sigura cu tur centro tradicional ta habri, cu excepcion di e puntonan di apoyo, manera e universidadnan, cu ta cera den fin di siman debi na e poco asistencia.
E mandatario a referi tambe na e casonan di tercer dosis cu a aplica, cu a resulta un exito den e sentido cu ningun di nan a keda contagia ni hospitaliza. Segun Rivera ocupacion di hospital ta na 17%, y cu tin centro manera Luis Eduardo Aybar cu no tin ningun pacient di Covid-19 actualmente.
E cifranan general ta bisa cu Republica Dominicana a yega na un total di 346.997 caso di Covid-19, cu solamente 304 caso nobo ayera. Actualmente tin 5.052 persona contagia na henter e pais (di 11 miyon habitante). Autoridadnan no a reporta mas morto den nan boletin 518, y cantidad di morto desde inicio di e pandemia a keda na 3.989. A indica tambe cu e pais tin 575 cama di ICU disponible, di cual 123 ta ocupa. Pa tratamento general di Covid tin 2.469 cama, di cual solamente 411 ta ocupa.
