Ayera pa 8or di anochi, prome minister Evelyn Wever-Croes a duna un discurso nacional transmiti riba varios medio di comunicacion. Den esaki, el a duna informacion tocante cada ministerio di su gabinete, y tambe tocante e vision pa continuacion di su maneho.

Prome minister a cuminsa destacando e impacto negativo di e guera na Ucrania riba economia mundial cu tambe tin efectonan riba Aruba, por ehemplo door di aumento di prijs di gasolin. Aruba su economia ta recuperando, y cu esaki ta depende riba recuperacion di turismo, cual ‘ta bayendo hopi bon’.
Wever-Croes a destaca cu turismo riba su mes no por carga economia di nos pais, pues ta buscando ‘mas inversion y mas desaroyo economico’. “Diversificacion di nos economia ta crucial, y aki nos sector di energia por hunga un papel importante. Tambe mi ministerio di Infrastructura por hunga un papel importante den esaki.” Pero el a destaca cu desaroyo mester bay den balans cu proteccion di naturalesa y medio ambiente. “Nos meta no ta solamente realisa un crecemento economico, esey ta simplemente e vehiculo, pasobra nos meta mester ta pa crea cuponan di trabao duradero y asina crea progreso y bienestar real pa tur ciudadano di nos pais.” Segun Wever-Croes, e tipo di desaroyo aki mester genera entrada pa Aruba por yega na finanzas sostenible y saludable. “Y nos por, pasobra prome cu pandemia nos a yega na e punto aki caba”, el a expresa.

Wever-Croes a bisa cu su gobierno ta enfoca riba haci Aruba mas fuerte y resiliente basa riba realidad y ‘no palabranan bunita’, y esey ta e enfoke di e reunionnan cu representantenan di Reino.

“Sin cambio, Aruba lo no sali di e problemanan financiero cu nos pais ta aden (…) P’esey a haci palabracionnan cu Hulanda pa reforma riba tereno financiero, gastonan di sector publico, tereno economico laboral, husticia, cuido y enseñansa.”

Finalisando, Wever-Croes a bisa: “Hopi biaha hendenan ta bisa, cu nan kier laga un miho planeta pa nos yiunan, pero ami kier pa nos enfoca tambe; con nos por laga miho yiunan pa nos planeta. Y pesey e reformanan ta necesario. pesey nos mester atene nos mes na Realidad, Ley y Reglanan. Pesey nos mester coregi cosnan cu tabata bay robes, pa crea un futuro cu no ta persigui pa pasado, pero cu ta crea oportunidadnan nobo pa progreso y bienestar sostenible y duradero.”

LEAVE A REPLY

Please enter your comment!
Please enter your name here