Durante conferencia di prensa di gobierno ayera nochi, prome minister Evelyn Wever-Croes a duna comentario tocante e situacion actual di Aruba relaciona cu reapertura di nos economia.

Despues di un luna sin caso nobo di COVID-19 na Aruba, nos ta drentando den un weekend den cual Wever-Croes a expresa: “Nos ta mira cuanto movemento y actividad tin riba caya, cu happy hour, cu hopi bebemento, mi ta preocupa un biaha mas.”
El a bisa cu fin di siman pasa, como comunidad a tuma nota di comportamento y accionnan cu no ta bon y cu no ta yuda den e crisis actual. “Mi ta spera cu e weekend aki no ta mescos.”

Ademas, Wever-Croes a introduci un adres di e-mail nobo, pa ciudadanonan por duna keho tocante normal nobo, den caso cu algun negoshi of persona no ta cumpli. Esaki ta: cumpli@crisis.aw. Riba e e-mail aki por entrega keho den caso cu tin negoshi cu no ta cumpli cu higiena of distanciamento social, y e casonan lo ser atendi.

Enseñansa.
Wever-Croes tambe a haci referencia na enseñansa y e normal nobo. El a cuminsa bisando cu na momento cu a tuma e decision pa permiti tur scol habri bek, den e fase 3 actual, nan a tene consideracion cu bienestar, salud, proteccion y seguridad di docente. Segun Wever-Croes, un punto cu a trece hopi preocupacion ta e varios cambio den algun scol. A pone mas atencion na aspectonan financiero di Enseñansa, pa usa e finanzas limita den un forma mas eficiente, resultando den cambio den organo di DPS. Minister di Enseñansa, Armando ‘Rudy’ Lampe ta bezig cu cambionan den organisacion den cual ta involucrando tur personal, segun Wever-Croes.

El a declara cu tambe tabatin cambio den Fontein Kleuterschool y Colegio Hilario Angela, cual ta scolnan publico y lo keda scolnan publico. Sinembargo lo pasa na un otro sistema di educacion, esta e renombra sistema Montessori. Tambe Scol Paso pa Futuro y Emmaschool, cu a bisa cu lo pone nan hunto, no a resulta asina sino lo keda separa y dunando e mesun servicio. El a menciona varios scol MAVO, di cual tur ta bay keda scol publico. “Abraham DeVeer school no ta cay bou SVOA, y Colegio San Nicolas no ta bay den Schakel”, pero esaki ta conta pa e proximo 12 luna, den cual segun Wever-Croes lo tin dialogo y evaluacion pa determina kico lo ta e futuro a largo plaso di e scolnan. Igual ‘EPI no lo cay den EPB’ ainda. Pa cu Colegio Playa, Wever-Croes a bisa cu nan ta purbando intermedia.

Pa finalisa, el a bisa cu ta trahando pa mehora comunicacion den enseñansa, y esey ta e motibo cu a menciona e situacion di Enseñansa den e conferencia di prensa.