Dialuna ultimo den oranan di mainta, durante e reunion publico den Parlamento riba e Clausura di aña Parlamentario 2020-2021, Prome Minister Evelyn Wever-Croes a duna entrega palabranan di motivacion deseando tur Parlamentario hopi exito den e Aña Parlamentario 2021-2022. Prome Minister a comparti 3 deseo cu e tin pa e Parlamento nobo. Ya caba e fundeshi a wordo poni den e Parlamento den e aña 2020-2021 y Prome Minister a expresa su deseo pa esey continua den e aña Parlamentario nobo.

Independisacion di nos parlamento

E prome deseo ta un Parlamento fuerte. Pa finalisa cu e plan di independisacion di nos Parlamento den e aña Parlamentario nobo nos dilanti na e modelo cu Parlamento ta scoge p’e, pero un Parlamento fuerte cu por bringa cabes na retonan cu Aruba ta enfrentando. Esfuersonan a wordo haci pa logra independisa Parlamento y e deseo ta pa pronto esaki por wordo realisa.

Cristalisa ombudsman

E di dos deseo ta di mira e ombudsman cristalisa. A cuminsa cu esaki pero lamentablemente pa algun diferencia di opinion no por a keda cla cu esaki. Prome Minister ta expresa su confiansa cu e Parlamento aki, cu a demostra cu ta esun cu a bin cu e iniciativa pa bin cu un ombudsman, unanimamente lo accepta e ley di Ombudsman. Aworaki ta na e momento crucial di demostra cu nos ta kere den un Ombudsman, ancra den constitucion.

“Ohala cu nos por pone nos diferencianan un banda y logra cu esaki por pasa y asina duna pueblo loke pueblo ta pidi di e Parlamento aki, esta pa e Ombudsman por ta ancra den nos constitucion y pa e por funciona como defensor di pueblo”.

Mantene reglanan di integridad na halto

E di tres deseo grandi ta pa Parlamento aki mantene e reglanan di integridad asina na halto. A papia hopi di dje, tin un ley di integridad cu ta den tratamento y ohala cu hopi trempan den e aña parlamentario nobo, e ley aki por pasa pasobra pueblo kier esaki. Pueblo ta pidi pa tin regla pa asina por atene su gobernantenan y Parlamentarionan na nan.

Si e ley aki pasa, tur Parlamentario cu ta bou di investigaion actualmente lo tin cu bandona nan cargo na e momentonan aki anto e ora ey porfin por hala rosea akiden y bisa cu e Parlamento berdad ta para pa reglanan di integridad”.

Prome Minister a termina deseando cada Parlamentario exito den e aña Parlamentario 2021-2022 y cu e 3 deseonan aki biba tambe den curason di cada Parlamentario pa asina nos pueblo por conta cu un Parlamento cu ta digno di confiansa di un y tur.

1 COMMENT

  1. Mi humilde opinion Mike Eman mester gewoon abstene su mes na duna comentario over di e situacion penoso cu nos pueblo ta bibando aden!, pasobra ta e y su compinchinn cu a goberna e isla ki pa 8 aña a hasi y deshasi di e pueblo ki despues cu a dunann e mandato absoluto! Y a laga nos den e debe monstroso ki
    Un CRIMEN di mas GRANDI cu un pueblo por A hasi contra su mes ta, door di confia siegamente y dunann carte blanche mandato absoluto na un partido cu den pasado caba a jega di comete fracaso tras di fracaso consientemente.
    Ta di compronde cu ta pesey mes la bai para te na paaz . Anto pa awo e mes bin sinta critica y mustra dede cu ta e gobierno actual por yuda. pa ley nn mester a kita tur boso derecho hasta pa specula of opina algo.

LEAVE A REPLY

Please enter your comment!
Please enter your name here