Ta awor tin estudionan tumando luga y ta apenas awor a institui un comision pa studia si por ‘swap’ y na ki balor por ‘swap.’ A splica esaki publicamente den prensa y ultimo den Parlamento.

Asina Prome Minister Evelyn Wever Croes a reacciona riba e informe cu a cambia un tereno di hopi balor pa construccion di un edificio di 5 miyon florin. Den e articulo publica pa Bon Dia Aruba, huristanan entre otro a cuestiona cua ta e base legal cu a usa pa e ‘swap.’

Segun mr. Evelyn Wever Croes, el a splica ampliamente cu awor e proceso di taxatie ta bay

tuma luga y esey ta den e MoU cu a firma cu Bohama dia 21 di October ultimo. Y Parlamento a haya oportunidad pa tira bista riba e documento, cu ta un declaracion di intencion. Mas ainda, Prome Minister a contesta tur pregunta cu e Parlamentarionan tabatin.

“Pues, awor ta bay haci e estudionan y despues lo duna mas informacion asina cu e comision ta cla cu su proposicionnan.” Locual Prome Minister a bisa ta cu mester corda cu Gobierno no por ‘swap’ algo di balor halto pa algo di menos balor, pasobra esey e ora ta bira un ‘schenking’ esta un regalo. “Un ‘schenking di Gobierno mester pasa Parlamento prome, sino e no ta valido,” Prome Minister a laga sa.

Pa loke ta e MoU mes, el a bisa cu esaki ta un acuerdo pa diferente departamento di Gobierno y otro instancia traha hunto y e cuadro cu nan mester tene cuenta cu n’e. “P’esey e ta un MoU, e no ta un acuerdo ainda.” Mas ainda, un MoU no ta mara e partidonan. “Esey ta e sistema di traha normal den tur transparencia,” Prome Minister a bisa Bon Dia Aruba. “E lo tabata miho si a puntra prome (cu a publica e articulo),” tabata e comentario di e Prome Mandatario.

E diseño di e edificio nobo pa Duane tabata traha den tempo di Gobierno di Mike Eman II y awor ta bay mira ki cambio mester haci na dje. “E proceso aki a cuminsa cana varios aña pasa. Ami ta e di cuater Minister cu ta atende cu e caso.” Contento cu proyecto di Bohama Sinembargo, na momento di a firma e MoU, Prome Minister Evelyn Wever Croes a bisa cu e tabata un momento grandi pa por fin a yega asina ley di firma e documento. E video ta riba e pagina di Gabinete Wever Croes unda Prome Minister mes ta declara cu awor ta asina leu cu a firma e MoU cu Bohama pa traha un edificio nobo pa Duane, cu pa hopi aña tabata funcciona for di diferente edificio, separa di otro. “Y esey no ta contribui na e spirito di ekipo, Awor ta bay haya edificio nobo na Barcadera, funccional ya cu Duane ta funcciona manera punto central.

Un edificio moderno cu ta cumpli cu tur exigencia y cu ta bay trece, mi ta sigur un miho ambiente na Duane. Mesun momento nos ta bay soluciona un problema hopi grandi na Playa cu ta e edificio actual. E ta un dolo den nos curazon pa mira e edificio decai bashi, sin atencion,” mr. Wever Croes a bisa den e grabacion. “Pero mi ta gradici DOW, Bohama, Duane y Directie Financien, Minister di Financien, Departamento di Asuntonan Huridico, tur cu a traha hunto pa por a yega na un solucion. El a tarda hopi. Pasobra no ta algo cu ta pasa tur dia unda ta pasa un edificio, cu ta un manera swap, e mester a worde bon haci, bon coordina.”

Sinembargo, a bin un pausa den e proceso pa motibo cu Gobierno a cay. “Den e periodo demisionario m’a scohe pa no tuma un tipo di decision aki. Pero awor aki, net un luna despues di Gabinete Evelyn Wever Croes 2, (mi ta) hopi contento cu awe mi por a firma e MoU aki. Cu e cambio cu e desaroyo cu Bohama kier trece eynan na Playa, ta trece desaroyo grandi y ohala un impacto grandi den desaroyo di centro di ciudad. Nos ta mira cu poco poco nos ta solucionando e problema di edificionan para bashi y esaki ta un ehempel di nan. Mi kier gradici tur esnan cu a haci esaki posibel y felicita DOW, Bohama y specialmente tur Duanero cu pronto lo haya un bunita edificio pa por traha riba dje,” mr. Evelyn Wever Croes a bisa dia 21 di October ultimo. Es mas Director di DOW ing Marlon Croes a amplia bisando cu e declaracion di intencion aki, esta e MoU ta nifica cu awor ta sigui e proceso den grupo di trabou, hunto cu Bohama pa explora posibilidadnan con “nos por bay formalisa e proyecto di Duanekantoor, unda nos lo construi e Duanekantoor na Barcadera y con ta sigui cu e Duanekantoor na Playa, cu ta bandona, por worde comberti den un proyecto di vivienda cu ta bay duna balor na centro di Oranjestad y su funccionamento. E intentie verklaring ta firma y ta duna nos e posibilidad pa mira si nos por yega na otro pa e detayenan y asina present’e na Minister pa haya aprobacion pa nos por sigui na construction si mester.

Rendering ta cla

No a haya reaccion riba riba e pregunta si e declaracionnan aki no ta indica cu tin

palabracionnan concreto, unicamente cu awor ta bay haci e trabou y cu asina cu tin mas

infomacion lo presenta esaki. Sinembargo, esaki no ta kita e impresion cu en todo caso Bohama ta conta cu e ta bay haya e propiedad na LG Smith Blvd 84, mirando cu ya caba tin un diseño. E diseño ta cla desde April caba. Expertonan a bisa Bon Dia Aruba cu un ‘rendering’ asina ta costa 20 porciento di e trabou di e ingeniero y como tal mester calcula cu e diseño presenta pa Gobierno mes, pero cu ta di Bohama a costa no menos cu 100 mil florin, pero por ta mas. Mas ainda, pasobra Bon Dia Aruba a compronde cu a laga traha un ‘fly through video’ di e diseño tri-dimensional cu

ta hoi mas caro ainda. No por a confirma e informe aki, sinembargo.

Destaho publico

Bon Dia Aruba a tuma contacto cu abogado mr. Hans Sjiem Fat kende den pasado a hasta

duna curso pa personal huridico di DIP riba e Landsverordening Uitgifte Terreinen, LUT.

Segun mr. Sjiem Fat, un Gobierno por actua tanto den su calidad publico basa riba derecho

publico, pero tambe como propietario di terenonan na Aruba, cu ta nifica cu e Codigo Civil ta

drenta den wega. Gobierno por duna tereno den erfpacht, huur, bende, por cambia. “Tur

esakinan ta basa riba derecho civil. Esey ta base di cualkier transaccion.

E LUT ta strictamente riba erfpacht, por ehempel con pa stipula e canon. Sinembargo, Corte Supremo, esta Hoge Raad a dicidi cu por desvia di e LUT,” mr. SjiemFat a bisa. “Pero, Gobierno

mester cumpli si cu e Ley di Comptabilidad y esey tin di haber cu e autoridad di e Minister concerni, y manera cu ta conta den tur acto, reglanan general di bon gobernacion, sea si Gobierno ta actua den su calidad como instancia publico of civil, tin cu conta.” E abogado a enfatisa cu Gobierno ta keda Gobierno bou tur circumstancia y “e principionan di bon gobernacion mester prevalece, tur ora,” mr. SjiemFat a ilustra.

Ley di Comptabilidad ta bisa cu cualkier benta di propiedad publico of proyecto riba 100 mil florin mester bay destaho publico. Pues, Gobierno a firma un MoU caba cu Bohama pa traha e edificio nobo pa Duane, sin cu a pasa un destaho publico. E ley ademas ta bisa cu benta di un propiedad di Gobierno mester sosode pa medio di un benta publico despues cu e Minister concerni tuma e decision riba dje. Un trabou, of servicio unda e gastonan ta 100 mil florin of mas por sosode unicamente si tene un destaho publico.

Prome Minister a bisa Bon Dia Aruba cu e proyecto ta uno cu el a hereda di otro Ministernan. Es mas, ta berdad cu bou ex Minister Benny Sevinger a tuma luga un competencia pa diseña e edificio pa Duane na Barcadera. Sinembargo, e proyecto ey nunca a keda concretisa. Aunke tabatin un diseño ganado, e tempo a scoge pa e diseño di PMEC, cu a sali na di dos luga y tabata menos cu 10 miyon florin.