(AP)—Prome minister Hapones Fumio Kishida a adresa legisladonan Mericano na e Capitol ayera, urgiendo nan pa considera e importancia di compromisonan global durante un tempo di tension den e Pacifico Asiatico y hopi skepticismo den congreso tocante e envolvimento di Merca den exterior.
Kishida ta na Washington e siman aki bishitando presidente Joe Biden mientras e Cas Blanco ta anfitriona cada lider di e Quad—un partnership entre Merca, Hapon, Australia y India cu ta considera como importante pa defende contra e forsa creciente militar di China den e region. Kishida a subraya e balor di e compromiso Mericano pa seguridad global y a ofrece siguransa cu Hapon ta un aliado fuerte.
Riba Capitol Hill, su audiencia a inclui hopi Republicanonan cu a pusha pa Merca tuma un rol menos activo den asuntonan global mientras nan ta sigui e etos di “Merca prome” di Donald Trump, e probable nominado presidencial Republicano. E Cas bao control Republicano a sinta pa varios luna riba un pakete di 95 biyon dollar cu lo manda fondo di guera pa Ucrania y Israel, como tambe ayudo na aliadonan den e Pacifico Indio manera Taiwan y ayudo humanitario pa civilnan den Gaza y Ucrania.
El a busca pa recorda legisladonan di e rol cu Merca a hunga desde e Segunda Guera Mundial. Despues di a laga dos arma nuclear cay riba Hapon pa trece un fin na e guera, Merca a yuda reconstrui Hapon y e nacionnan a transforma for di enemigonan pa aliadonan cercano.
“Ora tabata necesario, el a haci sacrificionan noble pa cumpli cu su compromiso na un mundo miho,” Kishida a bisa di Merca.
Lider Republicano di e Senado Mericano, Mitch McConnel, a bisa na comienso di e siman aki cu el a spera cu e bishita lo subraya “cu nos ta den un situacion aki global contra e enemigonan di democracia—lidera pa China, Rusia y Iran.”
Hapon a tuma un rol fuerte den e apoyo di e defensa di Ucrania contra Moscu como tambe yudando ayudo humanitario yega Gaza. E tambe ta ser mira como un partner clave di Merca den un region tenso unda China ta afirmando su forsa y Nort Korea ta desaroyando un programa nuclear.
Kishida a ofrece siguransa cu Hapon tambe ta comprometi na seguridad global y derechonan humano. El a bisa cu desde cu e pais a recupera for di e “devastacion di e Segunda Guera Mundial,” Haopn a transforma for di un aliado reserva pa un partner fuerte “parando schouder pa schouder” cu Merca.
E prome minister a yama e posicion di China “sin precendente” y “e reto strategico mas grandi, no solamente na e paz y seguridad di Hapon pero na e paz y stabilidad di e comunidad internacional.”
Beijing a critica fuertemente riba e accionnan ey durante e bishita di Kishida.
Mao Ning, e vocero pa e ministerio di Asunto den Exterior Chines, a bisa cu “a pesar di e preocupacionnan serio di China, Merca y Hapon a ataca y a mancha China su nomber riba e cuestion di Taiwan y asuntonan maritimo, a interveni den asuntonan domestico di China y a viola normanan basico den relacionnan internacional.”
Mientras tanto, Kishida ta pronostico cu e futuro di e coflicto den Ucrania lo tin consecuencianan amplio. El a enfatisacu Hapon a compromete pa provee Kyiv 12 biyon dollar den ayudo financiero, incluyendo sistemanan di deteccion di drone.
“E Ucrania di awe por ta Oost Asia mañan,” Kishida a conta legisladonan, y despues a agrega: “Hapon lo sigui para cu Ucrania.”
E declaracionnan a haya un aplauso duro for di e camara pero un grupo di conservativonan a keda keto. Otro legisladonan a salta e discurso y personal di e Capitol a yena asientonan bashi cu ayudonan congresional.
