Siman aki, di 23 pa 27 di september, prome minister di Aruba, Evelyn Wever-Croes lo ta na New York pa asisti varios reunion y evento di nivel halto, na e di 74 Reunion General di Nacionnan Uni (‘General Assembly’).

E reunion general di Nacionnan Uni ta un reunion anual cu ta trece 193 estado miembro pa discuti y traha riba varios reto internacional entre otro desaroyo, cambio di clima, paz y siguridad y mucho mas. E reunionnan aki ta tuma luga tur aña cu tur e miembronan na e sede di Nacionnan Uni na New York.

Aruba lo forma parti di e delegacion di Reino Hulandes. E delegacion aki ta consisti di premier di Hulanda, Mark Rutte; premier Wever-Croes di Aruba; Prome Minister di Corsou Eugene Rhuggenaath y Prome Minister di Sint Maarten Leona Marlin-Romeo. Minister di Relacionnan Exterior Stefan Blok, minister Sigrid Kaag cu e cartera di comercio internacional y cooperacion pa desaroyo, Minister Cora van Niewenhuizen, encarga cu infrastructura y maneho di awa, Minister di Salubridad y Sport Bruno Bruins, y di Aruba minister Armando Lampe di Educacion, Ciencia, y Desaroyo Sostenibel tambe lo ta presente. Ademas e pareha real Rey Willem-Alexander y Reina Maxima tambe lo forma parti oficial di e delegacion di Reino Hulandes.

Segun un comunicado di gobierno, Wever-Croes lo organisa un reunion di tarima di mas halto durante e siman aki, riba e topico di implementacion di SDG 16+ door di islanan. Rey Willem-Alexander tambe lo ta presente na e evento di Aruba, hunto cu lidernan di region y paisnan mas grandi. E meta di e evento aki ta pa crea cooperacion cu otro islanan den desaroyo y organisacionnan di Nacionnan Uni pa yuda combati corupcion y pa fortalece institutonan transparente. E mesun topiconan aki lo wordo discuti durante prome minister su discurso na e revision di e SAMOA Pathway riba e retonan y progreso riba e area di integridad. Ademas, prome minister Wever-Croes lo atende varios evento importante y lo hiba discursonan riba topiconan di derecho di hende muhe, innovacion, cambio di clima, corupcion y tambe e implementacion di e metanan pa desaroyo sostenibel (SDGs).

Ademas di e eventonan formando parti di e reunion general di Nacionnan Uni, prome minister Wever-Croes lo tin varios reunion cu organisacionnan y institutonan importante por ehempel, World Tourism and Travel Council (WTTC), Clinton Foundation, Organization for Economic Cooperation and Development (OECD), y World Economic Forum (WEF). Ademas lo hiba diferente discurso y comparti Aruba su vision y plannan pa crea un economia resiliente, institucionnan fuerte y transparente catalisa door di innovacion.

E WTTC lo tene un forum cu e topico di Clima y Accionnan pa Medio Ambiente. Wever-Croes, lo tene su discurso durante e evento aki riba e topico di clima y desaroyo sostenibel di turismo. Ademas di esaki, Wever-Croes den nomber di Gobierno di Aruba, lo firma un Letter of Intent (LOI) cu WTTC pa fortalece e relacionnan cu partnernan pa por explora oportunidad pa sigui desaroya innovacion den turismo y biahe.

Pa locual ta trata Clinton Foundation, Wever-Croes a ricibi un invitacion pa un ‘roundtable’ priva, hunto cu ex presidente Bill Clinton y 25 diferente lider y ehecutivonan di companianan cu ta forma parti di Fortune 500. E topico lo ta e region Caribense, desaroyo economico sostenibel, innovacion y con nos por prepara pa retonan di futuro teniendo den consideracion e cambio di clima y nos medio ambiente. Clinton Foundation ta conoci pa ta hopi activo den Caribe, y specialmente pa asistencia brinda despues di desasternan natural, e comunicado ta continua.

Riba invitacion di OECD, Wever-Croes lo participa na e lansamento di un ‘Global Hub on the Governance for the SDGs’. A base di colaboracion, e ‘Global Hub’ aki lo stimula e capacidad di gobiernonan rond di mundo pa enfrenta e retonan cu ta bin cu e implementacion di e metanan global (SDGs), defini pa Nacionnan Uni. Wever-Croes lo elabora riba e prioridadnan pa Aruba, y e esfuersonan haci pa por logra y trece conscientisacion riba e metanan, Aruba su plan di maneho pa cu e-government y integridad. Esaki lo wordo haci den presencia di diferente mandatarionan y lidernan global, como tambe media internacional.

Pa cu e evento di World Economic Forum (WEF), topiconan cu lo wordo discuti entre otro ta: integridad, transparencia, iniciativanan pa combati corupcion, y e rol di tecnologia den tur esaki. Manera ta conoci, e topiconan aki ta di gran importancia pa Aruba, den cuadro di e prioridad estableci pa Gabinete Wever-Croes riba integridad y bon gobernacion.

Na comienso di e siman, Wever-Croes lo reuni cu un grupo di lider muhe prominente y ehecutivo na New York di institutonan importante y companianan di sector priva pa establece lasonan nobo pa Aruba y atrae inversionista pa proyectonan importante.

“E meta di e biahe aki ta pa crea partnernan pa por yuda resolve retonan social economico y pa logra un desaroyo mas sostenibel di nos isla. E ambicion di Aruba pa fortalece relacionnan cu organisacionnan paden y pafo di Nacionnan Uni y sector priva lo yuda nos logra nos metanan mas lihe”, e comunicado di gobierno ta finalisa.

 

 

LEAVE A REPLY

Please enter your comment!
Please enter your name here