(Nacionnan Uni) – Prome Minister di Saint Vincent & the Grenadines, Ralph Gonsalves a urgi pa paisnan yuda generosamente cu placa despues cu e volcan La Soufriere a sigui cu su erupcion, creando devastacion riba e isla.

Gonsalves a bisa cu “por fabor yuda nos pais den e mey anochi di necesidad,” durante un reunion di Conseho di Siguridad di Nacionnan Uni.

E volcan La Soufriere ta uno activo, pero a explota den erupcion pa prome biaha dia 9 di April. E erupcionnan tabata diario desde e dia ey, cu nubianan di shinishi ta cubri henter e isla y hasta yega otronan. Es mas, cambio den direccion di biento den atmosfera halto ta hasta pone cu Aruba lo por sinti efecto di e nubia di shinishi e siman aki.

Gonsalves a bisa cu casi un den cada cinco di e 110 mil habitante di e isla a keda evacua. pero cu e situacion lo bira mas precario na momento cu e temporada di horcan cuminza aki seis siman. “E ta un reto monumental di sosten humanitario, incluso e consideracionnan di siguridad, recuperacion y reconstruccion,” e Prome Minister a bisa na e miembronan di e Conseho di Siguridad di Nacionnan Uni.

“Sin cooperacion efectivo entre Saint Vincent & the Grenadines, Nacionnan Uni y e organizacionnan regional, nos bida y biba lo ta totalmente imposibel,” Gonsalves a señala y a urgi pa paisnan miembro di Nacionnan Uni ta generoso cu nan sosten financiero.

Awe Nacionnan Uni ta cuminza cu e peticion pa sosten financiero.

Saint Vincent & The Grenadines ta e pais mas chikito pa sinta den e Conseho di Siguridad di Nacionnan Uni. E termino como miembro no-permanente ta caba December awor.

Di su banda, Presidente di Digicel Denis O’Brien ta pidi Reino Uni pa lanta para y haci lo corecto pa yuda e pais miembro di Mancomunidad Britanico. “Paisnan manera Saint Vincent & The Grenadines tabata historicamente nacionnan esclavo di Reino Uni y desde su independencia na 1979 a mantene lazonan fuerte cu Reino Uni. A pesar di a contribui na Reino Uni, e pais no ta trata e habitantenan di e miho manera y unicamente a priminti pa yuda cu 200 mil libra Britanico, cu ta 276,670 dollar Mericano, algo cu O’Brien a considera como un ‘sla den cara di hendenan di e pais, cu ta miembro di e Mancomunidad y ta haya nan mes den un situacion di desesperacion.”

 

LEAVE A REPLY

Please enter your comment!
Please enter your name here