Aruba no ta bay fia 400 miyon, sino ta sacando bononan di 60 miyon florin y 60 miyon dollar. Asina a manda contesta Ministerio di Asuntonan di Reino cu a manda un comunicado di prensa diabierna ultimo, pa expresa malcontento cu e decision di Aruba pa hinca Aruba den man debe innecesariamente.

Mesora despues cu a publica e relato, unda Secretario Knops a bisa cu e decision di Gobierno di Aruba ta duna cada ciudadano un debe adicional di 1400 florin, ademas di ta hinca Aruba den e 10 paisnan cu mas debe na mundo, Gobierno a dicidi di contesta Hulanda cu un relato di prensa tambe.

Den e relato, Minister Presidente di Aruba, Evelyn Wever Croes y Minister di Finanzas y Asuntonan Economico, Xiomara Maduro a bisa cu e relato di Ministerio di Asuntonan Interior a usa e cifranan robes, como tal, e calculacion di interes cu a presenta no a ta cuadra. Pues, e prestamonan di 60 miyon florin y 60 miyon dollar no ta representa 21 miyon florin adicional na gasto anual di interes, pues no ta un peso adicional di 1400 florin pa cada ciudadano Arubiano. Segun Wever Croes y Maduro, tambe lo a pretende cu lo mester haci reembolsonan intermedio pa purba baha e debenan. Esey lo por sucede cu un prestamo di auto of hipoteca, pero pa un pais, e unico manera pa baha debe, ta pa percura cu tin mas entrada cu gasto. Pues, surplus. Paga prome cu e termino caba ta zona bon, pero no tin sentido si no tin surplus. Unicamente ora tin surplus lo por realmente cuminza paga e debenan y baha nan.

Banda tur esaki, Secretario Knops ta pretende cu e quota di debe di Aruba ta subi na 127 porciento di nos Producto Bruto Nacional y na un manera chistoso a bisa cu Gabinete ta den un competencia pa haya un posicion den e 10 paisnan cu mas debe na mundo. Mester bisa aki cu prestamonan di Hulanda, e quota di debe tambe lo pone Aruba yega na e mesun posicion aki. Pues pa e quota di debe y posicion di debe, e no ta haci un diferencia pa Aruba di unda e prestamo ta bin. E unico manera ta pa e quota di debe no aumenta ta si Hulanda dicidi pa haci un ‘schenking’ un regalo, algo cu, contrario na e situacion di Spaña y Italia, no ta ni riba mesa pa discuti.

For di e declaracion aki, segun Wever Croes y Maduro, ta mustra cu Ministerio pa Asuntonan Interior tin problema pa haci distincion entre ‘debe’ y ‘prestamo.’ Un prestamo ta un debe, pero no tur debe ta prestamo. Esey ta nifica cu pa e aña aki, hasta si no haci ningun prestamo, e nivel di debe y quota di debe ta bay subi. Motibo ta cu pa e aña aki, e gastonan riba presupuesto ta mucho mas cu e entradanan. E ta asina pa motibo cu Gabinete ta purba wanta economia riba pia.

Finalmente, ta acusa Gobierno di no ta papia directo Ministerio pa Asuntonan Interior pero si ta papia publicamente riba dje e Ministerio. Esaki ta un ironia, pasobra e relato di prensa cu a manda diabierna ta e di tres biaha cu ta papia di Gobierno di Aruba, sin cu a comunica internamente prome. Tabata e Representante di Gobierno Hulandes cu su cede na Willemstad a tene un discurso publico, sigui despues pa e conferencia di Prensa di Secretario di Estado Knops di siman pasa, y e di tres biaha ta e relato di prensa. Aruba en todo caso ta dispuesto pa dialoga cu Ministerio pa Asuntonan Interior y di Reino den forma habri pa realmente yega na un consenso, segun e declaracion di Maduro y Wever-Croes.

LEAVE A REPLY

Please enter your comment!
Please enter your name here