Mientras gobierno di Nicolas Maduro ta busca scenario nobo pa e dialogo na Europa y ta ricibi bishita di e Alto Comisionado di Nacionnan Uni pa Derecho Humano, Michelle Bachelet, nan ta trata di laga oposicion sin oxigeno pa asina consolida nan poder.
Un total di 22 diputado di Asamblea Nacional, incluyendo algun suplente, mester a pidi asilo politico na embahada, ta deteni o a exilia den otro pais. Na mesun momento, e regimen a pone dialuna pasa e parlamentario Gilber Caro den libertad, deteni for di 26 di april.
Richard Blanco, un di e 14 diputadonan cu, segun husticia Venezolano, ta vincula na e intento di golpi di estado fracasa dia 30 di april ultimo, a huy pa Colombia dialuna pasa, despues di pasa mas di un luna refugia den embahada di Argentina na Caracas. ‘Ningun hende por silencia mi. Pesey mi a dicidi di crusa frontera’, el a publica riba su cuenta na Twitter, hunto cu un potret canando riba un bereda, e manera informal di crusa frontera.
E parlamentarionan Tomas Guanipa y Jose Guerra di Primero Justicia y Liliana Hernandez di Un Nuevo Tiempo tambe a sali di e pais, despues cu polis politico a invadi nan viviendanan. Nan por spera un sentencia hudicial despues cu nan a perde nan inmunidad parlamentario, aunke ainda e Tribunal Supremo di Venezuela no a emiti ningun comunicado oficial al respecto.
Den un cuadro mas amplio, e lista di dirigente opositor cu a sufri represion, detencion o a keda forsa pa bandona e pais, ta yega na 70 persona.
E agresion di gobierno di Maduro a afecta seriamente e structura dirigente di oposicion y di Asamblea Nacional, aunke ainda tin quorum legal y por continua trabao.
