E reunion pa trata un parti di e provisionnan transitorio (overgangsbepalingen) di e Codigo Civil aproba riba 8 di september 2016, a wordo posponi ‘tot nader orde’, despues di a yama 3 reunion. E splicacion di Presidente di Parlamento pa esaki, ta cu tin personanan malo den parlamento y cu sigui yama reunionnan sin siguridad riba un fecha definitivo ‘no ta netjes’. Pero con e historia legislativo di e ley aki por informa e situacion actual?

Den e historia largo cu e cambionan aproba riba 8 di september 2016 a pasa den dje, tin un par di eventonan cu por informa e situacion actual, unda cu e e tratamento di e ley cu a cuminsa su bida den 2009, a wordo posponi.

E prome punto cu mester remarca ta cu e cambionan cu a aproba den 2016 ta encera 397 pagina di cambio. Pero, tur e cambionan aki no ta wordo trata di un bes den e ley cu su tratamento a wordo posponi te proximo aviso.

Ehecucion selectivo

Ultimo den october di 2020, por a mira cu un parti di e cambionan aki a wordo pasa den su propio ley pa provisionnan transitorio (overgangsbepalingen). Esaki ta encera buki 2 di Codigo Civil, cual ta regla derecho di persona huridico (rechtspersonenrecht). Riba 5 di october 2020 e Aanpassingsverordening Boek 2 BWA a wordo pasa. Siguientemente riba 27 di october 2020 un Landsbesluit a wordo firma, pa laga ehecuta e cambionan aki.

Prome cu esaki, un parti chikito di e cambionan cu a wordo pasa den september di 2016 a wordo pasa pa ehecucion. Esaki tabata encera cambionan pa implementa e tratado pa derechonan di mucha, specificamente pa apunta e instancia unda mester meld abuso di mucha. Articulonan 243a te cu d di e manera aki a wordo treci den ehecucion por medio di e Landsbesluit di 5 di mei 2019.

Na mes momento mester remarca cu cada proceso di ley ta diferente y tin varios circunstancia cu ta afecta cada un. Sinembargo ta importante pa subraya e echonan den e historia di e ley aki cu ta remarcabel mirando e aspecto controversial di union civil.

Ley a parkeer na Parlamento ya pa 1 aña

Presidente di Parlamento Juan ‘Ady’ Thijsen a indica cu e ley aki mester wordo trata mas pronto cu ta posibel, den su opinion, y mas bien ta un formalidad mirando cu ta cambionan cu ya a wordo vota riba dje den pasado. E splicacion tras di e decison pa pospone tratamento di e ley aki te proximo aviso, ta cu ya a yama 3 reunion cu no por a bay manera plania pa via di personanan malo den parlamento.

Un prome reunion a wordo yama pa 9 di februari, despues el a bira 11 di februari, y pa tercer biaha el a bira 16 di februari. Thijsen a splica Bon Dia cu e no ta haya bon pa keda yama reunion indefinidamente, pues a dicidi pa no sigui pone fecha te cu por pone un definitivo. Manera parlamentario independiente Daphne Lejuez a opina anteriormente den nos matutino, esaki sinembargo no ta cuadra cu e echo cu riba 23 di februari y 24 si a plania reunionnan pa trata ley di admision (LTU) y constitution (Staatsregeling) consecuentemente.

Acercando Thijsen cu e discrepancia aki, a conduci na e contesta cu a laga un fecha habri, esta dialuna 22 di februari, pa asina trata e ley aki. Pero esaki ta depende di e circunstancianan, y si e personanan malo den parlamento por mehora den e tempo ey. Thijsen a agrega tocante e discrepancia cu: “Si e circunstancianan no cambia, e ora ey e otro leynan tampoco lo wordo trata riba e dianan cu nan a wordo plania. Esaki ta e circunstancianan cu nos ta den dje.”

Riba 20 di februari, esta diasabra di e siman aki, e ley aki lo a cumpli 1 aña cu el a parkeer na parlamento. Riba 20 di februari 2020 a traha e eindverslag riba e ley aki, despues di 17 di september 2019 cu el a wordo manda na parlamento. Esaki no ta e unico momento cu e ley a keda sin wordo movi. Conseho di Raad van Advies di 21 di februari 2018 a wordo manda na parlamento riba 11 di september 2019, 1 aña y 7 luna despues.

LEAVE A REPLY

Please enter your comment!
Please enter your name here