Imagina un carpinte cu no solamente ta traha mesa, pero ta traha su propio herment tambe. Y cada biaha cu e traha un herment nobo, e herment ey ta mihor, mas rapido y mas barata cu esun anterior. Cu e herment nobo, e ta traha un herment mas mihor ainda. Esey no ta ciencia ficcion mas. Esey ta exactamente loke ta pasando awor den mundo di inteligencia artificial.
Na Anthropic, e compania tras di Claude, e AI mes ta dirigi caba rond di 26% di e trabao di investigacion y desaroyo di AI. No solamente yudando, pero encabesando e trabao. Mas di 90% di e trabao aki ta wordo haci den colaboracion cu AI. Algun aña pasa, AI tabata un herment cu ta yuda programado. Awor, “AI agents” ta traha, test y mehora e programanan cu ta crea e siguiente generacion di AI. Y e porcentahe ey no lo keda na 26%. Tur señal ta indica cu e lo sigui subi, y rapido.
Na mes momento, e prijs di AI ta baha mas lihe cu practicamente cualkier otro innovacion moderno den historia. Computer, telefon celular, panel solar: tur a bira mas barata cu tempo, pero nunca na e velocidad aki. E ultimo update, Claude Opus 5.5, ta costa rond di 40% menos pa usa cu su antecesor, y toch e ta traha mihor. Normalmente bo ta paga mas pa haya mas calidad. Aki bo ta paga menos y bo ta haya mas.
Pa pone esaki den perspectiva local: den mi propio experiencia, despues di hopi prueba, mi a mira cu Opus 5.5 por completa un examen final completo di HAVO 5 of VWO 6 den menos cu cuater minuut. Ta trata di e mesun examennan cu nos yiunan ta prepara lunanan largo pa nan, y cu ta dura oranan pa haci.
Awor e pregunta grandi: kico nos por spera si e velocidad aki no solamente ta sigui, pero ta acelera? Pasobra esey ta e punto clave. Ora AI ta traha AI, cada generacion nobo ta yuda traha e siguiente mas lihe. E ta un ciclo cu ta alimenta su mes. E cambio cu nos a mira den e ultimo cinco aña por sucede den e siguiente dos, y despues den un aña so.
Mi ta mira tres cos cu nos mester prepara pa nan.
Prome, inteligencia lo bira un servicio barata, mescos cu awa y coriente. Un analisis, un traduccion of un consulta cu awe ta costa centenares di florin por costa algun cen. Pa un pais chikito manera Aruba, esaki ta un oportunidad enorme. Un negoshi chikito na San Nicolas lo tin acceso na e mesun capacidad intelectual cu un multinacional na New York. Nos tamaño no mester ta un limitacion mas.
Di dos, e mercado laboral lo cambia mas rapido cu nos sistema di enseñansa por adapta. Si un mashin por haci un examen final den cuater minuut, nos mester puntra nos mes kico nos ta midi realmente cu nos examennan. Y kico nos yiunan mester siña pa un mundo caminda conocemento so no ta suficiente mas.
Pensamento critico, creatividad, colaboracion y e habilidad pa dirigi AI lo bira e habilidadnan di mas balor.
Di tres, e distancia entre esnan cu sa usa AI y esnan cu no sa por crece hopi rapido. Esaki no ta un pregunta tecnologico, sino un pregunta social. Si solamente un grupo chikito beneficia, desigualdad na nos isla lo aumenta. Si nos tur siña, e beneficio por ta pa henter pueblo.
Nos no por para e ola aki. Pero nos por siña landa. Gobierno, scolnan, sindicatonan y empresanan mester cuminza prepara awe. No mañan, no den cinco aña. Den mundo di AI, cinco aña ta un eternidad. Esey ta precisamente e motibo di AI pa Pueblo: pa sigura cu e tecnologia aki no ta keda den man di algun hende so, pero cu cada Arubiano tin e oportunidad di siña us’e.
E pregunta no ta mas si AI lo cambia nos mundo. E pregunta ta si nos lo ta cla ora e cambio yega. Y a base di e velocidad actual, e ta yegando mas lihe cu nos ta pensa.
