‘Proyecto di Green Coridor ta sumamente grandi y ta avansando’

Green Corridor

Manera ta conoci e proyecto di Green Coridor lo bin y por mira cu trabounan ta avansando. Ingeniero Sr. Jossy Kock di Dienst Openbare Werken (DOW), kende ta manager di proyecto di Green Coridor, a splica riba e desaroyo di e proyecto.Ingeniero Kock kier sigui informa pueblo en general riba e avance di e proyecto di Green Coridor cu ta uno sumamente grandi. Actualmente e contratista a cuminsa pone fundeshi riba e caminda. Esaki a wordo poni desde e caminda di aeropuerto te cu Mahuma, tambe a cuminsa prepara trabou desde e caminda secundario despues di Mahuma pa Sero’i Teishi, siguiendo bay ariba te na Pos Chikito.

Actualmente DOW tin departamentonan di utilidad ta haciendo trabou pa locual ta toca nan departamento, e ingeniero a bisa. “Un di e puntonan cardinal y critico di e proyecto ta e rotonde, aki ta referi na e futuro rotonde di Sero’i Teishi,” el a indica. Actualmente Elmar ta trahando ey banda y asina cu nan keda cla, Setar lo drenta pa haci nan parti di trabou. E compania di WEB ya caba a haci un parti caba di e trabou cu mester a wordo haci na Sero’i Teishi.

Traha riba rotonde
Manera cu tur tres utilidad keda cla cu nan parti di trabou, e ora ey e contratista lo cuminsa traha riba e rotonde di Sero’i Teishi. “Ta asina aki cu e lo cuminsa cu e parti memey di e rotonde. Na unda un banda lo wordo construi completamente y despues cu e otro banda ta cla lo bay over na e banda pazuid,” e ingeniero a indica. Esaki tambe lo bay tuma luga na e rotonde di Mahuma, pero esey lo bay tuma mas den memey di tercer kwartaal di aña 2016.

Pakico esaki lo tuma luga na e momento ey? Segun ingeniero Kock, ta pa motibo cu e utilidad di Elmar tin un par di kabel cu mester wordo hala y drecha pa asina un rotonde por wordo construi eynan. Tur e trabounan aki lo tuma luga den e proximo dianan.

Tereno haci limpi
Tur esunnan cu ta pasa banda di e brug existente por mira cu ya caba tin gran parti di e tereno a wordo haci limpi. E contratista lo bay prepara pa cuminsa cu e construccion di e brug di Spaans Lagoen. “Nos a cuminsa na e parti di Pos Chikito unda e contratista a cuminsa pone bulto di tera. Pa asina e automobilistanan cuminsa custuma cu den futuro eynan no lo bay tin conexion mas cu caminda principal di San Nicolas pa Oranjestad,” e ingeniero a indica.

Den e proximo simannan cu ta na caminda, e contratista lo cuminsa haci cierto trabounan eyriba bek pa asina e por; 1. mantene e siguridad di e proyecto aki y 2. pa tene e stof un poco abou den e bisindario ey.

E asunto di stof, ta un di e kehonan cu DOW a haya, ta hopi stof ta wordo lanta eynan. Actualmente e contratista ta muhando e tera dos biaha pa dia pa asina mantene e stof abou. Y asina e bisiñanan of e bisindario no ta haya mucho molester di e stof.

You May Also Like

DOW a drecha tuberia cu tabata conecta mangelnan y lama

Director di Departamento di Obra Publico (DOW) Marlon Croes durante un conferencia di prensa ...

Scolnan Nos Paraiso, Maria Goretti y Pastoor Kranwinkel cera te dialuna

Ayera tardi SKOA a manda un comunicado pa informa cu Scol Preparatorio Nos Paraiso, ...

Project-BU-Airside-026.jpg

Controladornan aereo a evita un desaster na aeropuerto

ORANJESTAD – Reaccion rapido di controladonan aereo na Aruba a evita desastre na aeropuerto. ...

Aruba a ricibi 5 Adrian Awards pa logronan durante 2016

E organisacion prestigioso HSMAI (Hospitality Sales and Marketing Association International) a bolbe nombra e ...