Green Corridor

 Hopi cos tin di wordo haci pa asina e proyecto di green coridor keda cla. Pa e motibo ey den e proximo dianan cu lo bay bini, lo bin mas borchinan pa informa pueblo riba e proyecto di green coridor. Pero tambe loke ta importante riba e siguridad di trafico durante e dianan cu e construccion ta tumando luga. Ingeniero di Dienst Openbare Werken (DOW) Sr. Jossy Kock a splica mas riba esaki.

Un total di 4 borchi lo wordo poni cu lo ta indicando e proyecto di green coridor. Actualmente tin 1 borchi cu a wordo poni caba banda di e brug existente. E otro 3 borchinan lo wordo poni den e proximo simannan cu ta bin. E ingeniero kier a informa e pueblo di Pos Chikito y Savaneta cu lo bay tuma un anochi informativo dia 11 di november proximo pa 7’or na Club Universal. E anochi aki nan lo haya informacion di kico lo pasa dilanti nan cas. “Mi ta spera cu e bisindario, specialmente esun di Pos Chikito y Savaneta por acudi aki nan pa asina nan wordo poni mas na altura kico lo sosode den nan bario,” Sr. Kock a bisa.

“Pa ultimo mi kier a bisa tambe pa pueblo en genera y e usuarionan di e caminda principal tene cuenta cu tin construccion ta tumando luga, tene bo velocidad durante dia pero tambe mi ta pidi pa anochi tene bo velocidad abou pa motibo cu tin yen di cosnan banda di caminda na unda un bes bo core duro eynan y pa cualkier motibo bo kier hala un banda, bo por haya bo stroba di e parti drechi of robes si bo ta biniendo abou, cu cosnan, santo, construccion cu ta wordo poni eynan pa nan por sigui traha, e por forma peliger pa bo,” el a indica. Pa e motibo aki Dienst Openbare Werken (DOW) y e contratista ta pidi pa tene e velocidad abou y no core duro, specialmente entre e parti di Pos Chikito y aeropuerto unda tin construccion andando.

 

 

LEAVE A REPLY

Please enter your comment!
Please enter your name here