13Mei, JO, Psicologo1.JPG

Den cuadro cu e caso di e cachonan haya na Tanki Flip, riba media social por mira varios comentario caminda diferente hende a duna opinion basta fuerte relaciona cu e posibel problema mental cu e persona nan aki tin pa por biba den un situacion asina inhumano. Bon Dia a sinta cu psicologo Dimitri Halley na ‘Center For Self Development’ kende a splica cu nos comunidad mester purba di no ta asina lihe pa discrimina otro.

”Nos mester cuminsa bay hopi mas profundo den e analisis di kico a pasa, y tambe, no djis bay ataca y discrimina e hendenan aki cu nan ta loco y nan cabes no ta bon”, sr. Halley ta bisa.
sr. Halley ta agrega cu no tin mester di cana e caminda aki pa yega na un solucion ni tampoco cuminsa duna e persona medicamento, cual kisas a wordo haci caba y cu no lo realmente trece bon resultado.
Mester bay haci un investigacion profundo  den kico en berdad por a pone nan haci e cosnan aki of causa nan pa acepta un bida asina caminda casi no ta ricibi apoyo for di ningun hende.

”Nos ta comete e eror hopi biaha di wak e problema nan financiero  como un problema netamente financiero por ehempel ora cu cosnan no ta bayendo mucho bon economicamente. Pero esaki mes tin un rais mas profundo cu tin de haber cu hende cu ta gastando mucho hopi placa of cu tin un mal maneho riba esaki. E punto ta cu na Aruba ta parce cu nos no kier bay mas profundo den e problema nan mes” , sr. Halley ta splica.

Mester presta mas atencion riba e parti psicologico di cosnan
Segun sr. Halley, e comunidad di Aruba ainda falta di siña con pa analisa cierto situacion nan for di un perspectiva mas psicologico. Esaki segun sr. Halley ta algo fundamental cu Aruba constantemente ta lubida di analisa locual ta e parti paden mes di e persona.

”E banda psicologico nos no ta wak esey, anto bo por mira awo e consecuencianan cu sociedad ta manera bira un volcan cu ta basicamente explotando riba nos den tur caminda pasobra e parti mental no ta wordo apropiadamente atendi cun’e” , sr. Halley ta bisa.

sr. Halley ta agrega cu tin un resistencia grandi pa un hende of un sociedad pa inspecta mas profundo den su mes y su problemanan. ”Mientras nos ta keda trata e sintomanan for di exterior, nos ta perde curashi den busca un manera of otro pa bay na e rais di e problema cual ta abuso, negligencia, trauma; e atencion djis no ta bay na unda e mester bay. Nos ta perdiendo un generacion  di hoben hasta, y ningun hende ta mustra di worry” .

Nos pasado ainda tin un influencia grandi riba nos
Segun sr. Halley ta sigui conta Bon Dia, e topico aki por bay asina leu cu por conecta hopi di e problemanan colectivamente cu historia di Aruba den pasado. Aki ta referi na un pasado turbulento cu Aruba mes a hunga un rol den dje y na Merca un studio a wordo haci tocante esaki titula ”Post Traumatic Slavery Disorder”.  Compara esaki cu un hende cu ta bay den guera, segun sr. Halley ta splica, despues cu e persona regresa di guera y a pasa den trauma , hopi di e cosnan ey ta bini bek y persigui e. ”E trauma di e tempo ey nunca a realmente wordo resolvi, pues esaki ta wordo carga di generacion pa generacion, e ta wordo traspasa pa un otro nivel y definitivamente e ta hunga un rol awendia” , sr. Halley ta bisa.

Sr. Halley ta agrega cu bo por mira esaki entre e relacion di Aruba cu Hulanda mes. ”E relacion entre Aruba cu Hulanda ta kibra, e ta trauma anto ningun hende ta tribi di realmente trece e berdadero topiconan pa dilanti. ”Si nos no a confronta y siña for di nos pasado, e pasado ta bay confronta nos.”

LEAVE A REPLY

Please enter your comment!
Please enter your name here