Pueblo di Aruba ta cordialmente invita pa bin atende Expo di Salud enfoca riba malesanan cronico

Diasabra 24 di September lo tin un Expo di salud cu yama ‘Promove Salud y Bienestar 2022’ cu un focus hunto contra malesanan cronico. Esaki ta un evento pa hendenan cu ta sufri di malesanan cronico, pero tambe enfasis di prevencion di esaki.

“Nos no kier pa hende pensa cu ta solamente pa hendenan di edad so cu ta sufri di malesanan cronico, pero tambe hendenan jong y con nos ta bay preveni cu nan ta personanan cu ta bay tin esakinan den futuro. Semper bo tin cu pensa tambe riba no solamente bo familiar, pero abo , bo amistadnan, bo sernan keri y generacionnan cu ta bay bin despues di bo. Di esnan cu lo participa cu mastanto ta traha den prevencion pero tog ta purba link nan mes na malesanan cronico, algun di nan ta por ehempel gruponan di Ibisa, miembronan di DVG, stichting bob, famia planea, favi, y hopi otro colega cu a duna interes den esaki pero tambe colabora cu otro. “Pa no solamente e evento aki pero pa den futuro nos por logra mas y yuda otro den esaki tambe,” Dahariana Evertsz, Hoofd Health Promotion DVG ta splica.

Lo tin dokternan di cas presente cu lo duna informacion riba kico ta nan rol den comunidad. Aworaki nan ta hopi mas den media tambe pa informa y conscientisa riba por ehempel riba rekesitonan ora di cambia dokter, kico eigenlijk ta e rol di e dokter y comunicacion cu bo mester tin cu ne, y tambe enfoca riba e calidad di servicio.

Un instancia hopi importante ta e Bloedbank cu por cierto ta buscando mas donador y durante e expo di salud lo bo por haya sa kico eigenlijk e persona mester tin como rekesito, kico ta e estilo di bida cu eigenlijk bo ta pidi pa e personanan aki tin como boluntario, y tambe pa haya informacion riba: kico bo tin cu haci, cuanto biaha pa aña ta haci yamado y kico ta e verwachting. “Pasobra hopi biaha hende ta pensa pa bira boluntario como dunado, e ta mustra eng, bo ta pensa riba e hangua etc, pero e colegas di bloedbank ta hendenan profesional cu tin e expertisio y tambe ta duna bo un sensacion di calmo ora di haci e donacion aki.”

E Expo di Salud lo tuma luga na Centro Libertador Betico Croes, riba Diasabra 24 di September 2022, 10:00am pa 5:00pm, lo tin Booth Informativo, chekeo gratis y variacion di bebida y cuminda saludabel.

E evento ta completamente gratis, henter comunidad di Aruba ta invita pa ta presente.