Coast Guard Mericano na San Juan a informa ayera cu dialuna pasa a repatria 45 migrante deteni den tres diferente operativo na momento cu nan tabata trata di drenta Puerto Rico ilegalmente.
E embarcacion “Heriberto Hernandez” tabata responsable di repatria e grupo di 45 di e 49 inmigrantenan y entrega nan na armada Dominicano. E otro cuatro detenidonan ainda ta na Puerto Rico, y por enfrenta acusacion den corte federal pa trata di drenta di nobo na teritorio Mericano. Si haya e cuatro personanan aki culpable, nan por enfrenta castigo di 20 aña den prison y un fianza di te $250.000.
Segun Coast Guard, e prome intervencion tabata diabierna pasa durante mainta, ora un avioneta di Division Maritimo y Aereo di Border Patrol di Merca a mira un embarcacion yegando costa di Cabo Rojo. E agencianan federal a contact e Forsanan Uni di Accion Rapido di Polis di Puerto Rico, y un barco di nan a sali pa topa cu e lancha den cual tabatin seis homber biahando.
E di dos operacion tabata diasabra mainta, ora cu agentenan di Border Patrol a mira un barco sospechoso acercando Aguadilla. Den e intervencion a bin haya 26 migrante, 24 homber y 2 muhe.
E ultimo operativo tabata diasabra anochi ora Coast Guard a haya un lancha riba cual a bin topa cu 17 persona cerca di e ‘Canal de la Mona’ (e estrecho entre Puerto Rico y Republica Dominicana).
