Casi un luna despues cu horcan Maria a haci desaster na e isla, Puerto Rico ta ainda desespera pa haya ayudo den necesidad basico manera electricidad y awa. Diadomingo ultimo, ainda 85% di e poblacion no tabatin electricidad.

Gobernador di Puerto Rico, Ricardo Rosselló a bisa cu e ta planea pa restaura electricidad pa 95% di e isla su red di distribucion pa mita di december di e aña aki. Henter e sistema a collapse ora cu Maria a dal Puerto Rico, lagando mas di tres miyon persona sin electricidad.

“Esaki ta un agenda agresivo pasobra nos no por ta pasivo mirando e desafionan cu Puerto Rico ta enfrenta,” Rosselló a declara.  “Nos ta bay tin mester di pone tur man na obra.” Durante un rueda di prensa diasabra pasa, Rosselló  a bisa cu su meta ta pa tin 30% di e capacidad di e isla funcionando pa fin di e luna aki. Despues, e meta ta pa yega 50% pa dia 15 di november y 80% pa dia 1 di december.

Autoridadnan a calcula cu por tuma nan entre 6 luna pa un aña pa reinstala capacidad completo.

“Nos meta como gobierno ta pa duna poblacion di Puerto Rico acceso na electricidad cu velocidad y eficiencia,” el a pone riba Twitter.

E Cuerpo di Ingeniero di Ehercito Mericano (US Army Corps of Engineers) lo hunga un papel clave pa logra realisa e plan pasobra nan tin e recursonan y lo contrata e forsa laboral cu e entidadnan di e isla no tin, e gobernador  a bisa.

E Cuerpo ta trahando algun siman caba riba e isla despues cu e entidad federal di maneho di emergencia FEMA a duna nan e tarea di yuda reconstrui e infrastructura di e isla.  Nan tabata instala generador, pone dak temporal y reinstala linea di coriente.

E anuncio di e gobernador a bin despues cu un fayo den e sistema central a causa cu e porcentahe di cliente cu ainda tabatin coriente, a baha diabierna pasa.

Puerto Rico a bira dependiente di generador. Nan ta usa nan pa utilisa aparato cu ta salba bida manera ventilador y ekipo di dialyse, y tambe pa tene fan, aire condiciona y stoof funcionando.

Nan mester a haci cambio grandi den estilo di bida. Credit y debit card ta inutil. ATMnan no ta traha.  No tin internet, television o aire condiciona. Bateria di celular morto. Tur cos, di suministro di awa, tratamento di awa sushi te conservacion di cuminda ta bao menasa.