No ta solamente Codigo Civil ta wardando su ley di ehecucion. E ley di Tabaco, (Landsverordening beperking tabaksproducten) tambe ta cla pero despues di mas di cuater aña, no por keda implementa. Segun Raad van Advies, e ta muestra cu e proceso di legislacion no ta eficiente y mester puntra e ora, kico ta e motibo.

Manera ta conoci Parlamento a aproba e cambio den e ley di Tabaco na 2016, y mester a bin cu e ley di ehecucion pa asina por cuminza implementa e ahustacionnan. E ley ta bisa entre otro cu e ley ta riba productonan di tabaco cu ta destina pa huma y hala, incluso si nan ta geneticamente modifica. Ademas, kizas articulo 2 ta un di e mas importante, cu ta bisa cu tabaco ta prohibi denter di un edificio of espacio cu ta accesibel pa publico. Por tin excepcion pero mester cumpli cu condicionnan y haya dispensacion pa medio di un decreto. Articulo 3 ta bisa cu dunadonan di trabao ta obliga di tuma medidanan pa permiti trahadonan efectua nan responsabilidad laboral sin mester sufri daño of consecuencia di e uso di tabaco dor di otro. Articulo 4 di e ley ta bisa cu personanan cu ta permiti pa transporta publico ta obliga pa tuma pasonan pa sigura cu nan pasaheronan no ta exponi na efectonan dañino di productonan di tabaco.

No por huma den auto den presencia di menor di edad

Raad van Advies a manda otro conseho, unda kier coregi algun inconsistencia, segun e instancia, pa motibo cu a agrega provisionnan pa proteha un categoria specifico di persona cu no ta huma, particularmente mucha y hoben. Ademas kier haci ahustacion na e ley pa e ta relevante pa futuro tambe y agrega ponencia den e provisionnan di mantencion. Entre otro Raad van Advies ta comenta riba e problema, efectividad di e areglo proponi, como tambe e supervision y mantencion di e ley. E proposicion ta regla un prohibicion pa cualkier chauffeur y otronan den un vehiculo pa huma den presencia di un menor di edad. A propone un prohibicion di humamento pa menornan di edad y a hisa e edad minimo pa consumo te na 21. Pero, segun e organo Consultativo, e impacto di e provisionnan y e retonan riba e tereno di mantencion ta rekeri un argumentacion debido y den e splicacionnan, nan ta keda atras.

Por ehempel a propone pa amplia e ley cu productonan electronico (e-cigarettes) y productonan di yerba pa huma. Den e splicacion di e proposicion di ley ta bisa cu mas hoben ta usa e tipo di productonan aki, incluso pipa di awa, pero a bisa mesora tambe cu no tin data specifico, unicamente cu e porcentahe di humado na Aruba ta hopi mas abao cu por ehempel Hulanda y Merca. Sinembargo, tambe a keda estableci na 2012, a base di un investigacion cu practicamente tur categoria di edad ta huma.

Pakico mester amplia e ley

E falta di informacion recien pa Aruba ta lanta e pregunta pakico ta considera pa awor caba amplia e ley. Pa por evalua e proposicionnan di cambio, Raad van Advies ta kere cu mester amplia e splicacion y ilustracion con ya caba ta practica e maneho nobo aki den diferente sector, a base spontaneo. Por ehempel, ya ta prohibi pa huma den edificionan publico, aeropuerto, avion, transporte publico y tambe diferente hotel y restaurant.

E propio splicacion di e ley ta bisa cu humamento ta causante di malesa y morto na Aruba, cu cancer na pulmon como un causante, y cu humamento ta hisa e risico pa bira diabetico. Como tal Raad van Advies ta puntra si a bin cu iniciativa di maneho pa descurasha uso di productonan cu sucu y tambe introduci un plan di prevencion nacional, cu ta dirigi riba humamento, obesidad y tambe abuso di alcohol. Den e cuadro aki, Raad van Advies ta puntra si a evalua pa introduci medidanan pa limita consumo di sigaria, manera aumento di accijns.

Raad van Advies ta kere cu mester tin un infrastructura pa control, pasobra si no tin un control legal y efectivo riba e prohibicion lo no logra e obhetivo. Ademas, e hecho cu kier amplia e tereno di control, falta un miho bista con lo mantene y e forma efectivo di control, particularmente mirando cu tin hopi partido ta ofrece productonan di tabaco. Tambe lo kier sa con Gobierno lo efectua e control riba mantencion efectivo di e prohibicion di humamento den auto, unda tin menornan di edad presente, aunke cu ta den practica lo sali na cla di ki forma por crea un supervision efectivo y dirigi.

Fragmentacion di ley

E ley ta papia di reglanan di mantencion di e ley, pa medio di elimina e competencia pa por bende productonan di tabaco, unda entre otro por impone boet. E sancionnan administrativo ki ta regla den e Awb cu ta e Algemene wet bestuursrecht, di Hulanda. Sinembargo, Aruba no conoce un tipo di ley general asina. Consecuentemente, cada biaha ta inclui tipo di stipulacionnan di control y mantencion, cu ta conduci na un fragmentacion di control, den diferente ley.

Consecuentemente ta consehabel pa elabora tur provision di supervision y mantencion den e proyecto di ley mes. Raad van Advies ademas ta urgi Gobierno pa preveni mas fragmentacion y introduci un Awb pa Aruba mes. Den e extension di e argumento aki, Raad van Advies ta considera cu mester amplia e ley cu proteccion legal, ya cu actualmente e ley no tin ningun garantianan di procedura. No ta splica con y unda e ciudadano por busca proteccion di e sancionnan impone.

E splicacion di e ley tampoco ta duna suficientemente bista di e consecuencianan financiero pa pais Aruba, como tal, no ta cuadra cu locual articulo 6 di e ley di Comptabilidad, cu ta rekeri pa describi e costonan den e splicacion di un ley.

Casino

E ley ta usa termino manera espacio, edificio, un espacio y edificio cu ta accesibel pa publico, cu of sin e rekisito di pago, no obstante si ta riba tereno priva. Pero Raad van Advies ta haya cu asina mes no tin suficiente limite determina. Por ehempel, terenonan di scol tambe ta cay bao di e ley.

Pero kizas mas crucial ta e pregunta, con ta considera un casino. E ta un espacio of edificio cu ta accesibel pa tur hende of e hecho cu tin un edad minimo pa drenta, ta exclui casino di e definicion di espacio segun articulo 1, Raad van Advies ta puntra. E splicacion di e ley no ta duna suficiente claridad riba e aspecto aki.

Den e contexto aki mester considera pa amplia e prohibicion di humamento riba beach y parke publico manera ta e caso na otro pais.

Edad pa huma ta diferente pa edad pa bebe

Raad van Advies ta comenta cu a hisa e edad pa consumi producto di tabaco di 18 pa 21, y e argumento den e splicacion ta e psicologia di desaroyo. Pero, si ta enfoca riba e aspecto di salud, Raad van Advies ta puntra con e edad minimo aki ta compara cu e benta di bebidanan alcoholico cu awor ta na 18 aña.

Fayo den provision di mantencion di supervision y administracion

Raad van Advies ta bisa cu e ley di Tabaco actual ta falta un provision cu ta duna apoderacion pa drenta un cas sin permiso di e doño. Tin leynan cu ta rekeri un apoderacion di e huez comisario. Den e ley Calidad di Cuido di Salud, ta duna Procurador General e poder. Como tal Raad van Advies ta sugeri pa stipula cu mester un apoderacion pa drenta un cas y cu esaki ta na encargo di huez comisario. Consecuentemente, e ley ta menciona cu e supervision ta bao encargo di ambtenaar. Raad van Advies ta kere cu mester cambia e termino pa uno mas general, esta persona, pa tene na cuenta cu den futuro lo por haci uso di personanan den servicio di contract pa ehecuta e control.

Raad van Advies ta brinda un serie di otro conseho cu ta mas relata na ki ora ta duna boet, e forma con ta sanciona, y con ta evita pa un hoben menor di 21 por cumpra producto di tabaco, mientras cu e por cumpra cualkier otro producto.

Riba su mes, Raad van Advies ta para tras di obhetivo y contenido di e cambio di ley. Mester bisa cu no tin un fecha pa trata e introduccion di e ley di Tabaco.

Mester bisa si cu Parlamentarionan tabatin te cu 5 di Februari ultimo pa manda pregunta, y ainda no a haya contesta riba esakinan. Como cu no a haya contesta, no a yama e reunion publico ainda.