Clima di inversion di Aruba conoce diferente problema cu por stroba un crecemento economico duradero. Esey ta e conclusion di Raad van Advies, cu a identifica diferente desaroyo cu ta tanto un menasa pa desaroyo socio-economico di Aruba, pero tambe ta brinda oportunidad pa haci e desaroyo futuro uno continuo y duradero.

Gobierno a pone den su plan ’Economic policy: A strong and resilient economy 2019-2022’ cu e enfoke ta pa mehora clima di inversion y stimula un economia innovativo, competitivo y diversifica. Tambe a mustra cu den cuadro di e diversificacion economico, lo haci mas uso posibel di e posibilidadnan digital.

Sinembargo, a pesar di e intencionnan aki y e posibilidad economico, te ainda tin hopi asunto cu ta stroba cu no ta permiti pa haci uso optimo di e posibilidadnan pa desaroyo. Un investigacion di Banco Central di Aruba riba clima di inversion a indica cu mayoria respondente, kendenan ta lidernan den empresanan y companianan, a indica cu e nivel halto di belasting ta stroba e clima di inversion; servicio di Gobierno no ta contribui na creacion di un clima di inversion bentahoso; e proceduranan na Duane pa asuntonan relaciona na negoshi, ta hopi ineficiente; e mercado laboral actual y enseñansa na Aruba no ta cumpli cu e necesidad pa desaroyo di un economia competitivo; y e acceso y yega na capital no ta facil.

Vriendjespolitiek

Raad van Advies tambe a referi na e asina-yama ‘stakeholdermeeting’ di Banco Central di Aruba riba e costo di haci negoshi na Aruba, cu a produci e conclusion cu empresaria na Aruba ta relativamente caro y cu tur cos ta indica cu e ta bira mas caro den futuro. E gastonan halto di labor y e eficiencianan relaciona na labor, manera e limitacionnan (derecho laboral y mercado laboral di Aruba) ta hacie hopi caro pa por dirigi negoshi na Aruba, segun e participantenan.

Banda di esey, un gran parti di esnan cu a participa na e encuesta di Banco Central di Aruba a duna di conoce cu ‘vriendjespolitiek’ y corupcion ta dificulta competencia y cu corupcion mas bien ta parti di e cultura di empresa na Aruba. Esaki ta un percepcion cu no ta yuda e clima di inversion.

Den otro palabra, ta riba diferente frente mester bin cambio pa mehora e clima di inversion y haci’e atractivo pa asina eleva e nivel di actividad economico y desaroya actividadnan economico duradero. Y esaki lo no yuda e plannan di Gobierno pa logra su obhetivo pa desaroya sectornan prometedor manera economia circular, economia di conocemento y economia primario cu tur mester cumpli cu e condicionnan rekeri.

Mas ainda, mester remarca cu e puntonan problematico y e posibilidadnan economico duradero ya tin hopi tempo conoci y cu a haci diferente intento pa atende cu nan, hasta ora ta trata diversificacion economico. Como tal, mester analisa bon pakico no a atende cu e problemanan y kico a pone cu e accionnan cu a tuma no a resulta.

Crea un maneho teritorial integral

Manera e nota di maneho 2002-2005 ‘Vision, curashi y disciplina’ a menciona, e facilitacion di desaroyo economico y actividadnan den termino di reparticion teritorial economico y den termino di percura cu medio ambiente ta keda sostenibel ta di importancia crucial.

P’esey mes ta importante cu Aruba tin un maneho espacial integral, pa logra un medio ambiente di biba cu ta ordena, duradero y cualitativo. Aunke cu a pasa e Plan di Desaroyo Teritorial, ROP, na juli 2019, te ainda no a establece e leynan mes. Aruba a pasa su prome ROP na 2009, pero no a introduci e asina yama ‘voorschriften,’ cu a mara e ciudadanonan tambe na tur e rekisitonan.

E ROP di 2009 a caduca na 2019 y a bin uno nobo, pero atrobe sin e voorschriften, cu ta haci e plan uno relativamente facil pa ignora. E ROP y su voorschriften, e ROPV, mester percura cu e procesonan di construccion, vivienda, forma di biba y maneho di ambiente ta acopla na otro. Mescos ta conta pa e desaroyo y implementacion di un maneho di sushedad adecuado, integral y duradero, esaki for di punto di bista di medio ambiente y salud publico.

Raad van Advies ta kere cu mester enfoca riba un sistema di procesa sushi na Aruba cu ta responsabel y controla. E ley ‘volkshuisvesting, ruimtelijke ordening en milieubeheer’ di islanan BES por uza como ehempel. Un totalidad ordena y balansa dirigi na sostenibilidad ta garantisa no solamente un sociedad duradero, pero tambe ta promove Aruba pa su posibilidad social-economico, unda tin un bon clima di inversion, ta atractivo pa biba, traha y haci negoshi.

Raad van Advies ta yama atencion na e cantidad actividad di huurmento di cas y camber pa duracion cortico, esta e actividadnan di Airbnb. Tur ta rekeri un permiso pa por fungi como hotel chikito, pero no ta cla si tin forma pa controla si ta implementando cu e obligacionnan legal aki y ta den cua area tin mayoria di e tipo di actividad aki y unda ta permiti. Mester clarifica esaki den e maneho integral di espacio.

Mantencion di e reglanan di espacionan protegi

Autoridadnan encarga tin unicamente e Natuurbeschermingsverordening, e Ley di Naturalesa, pa por proteha flora y fauna endemico, ademas di e rikesanan geologico, arkeologico y historico den areanan natural. E instrumentonan di implementacion ta describi den e ley aki. Sinembargo, a mustra hopi biaha caba cu e instrumentonan represivo menciona no ta suficiente pa realmente brinda proteccion. Como tal, Raad van Advies ta conseha pa inclui sancionnan administrativo pa castiga y restaura dañonan haci, manera diferente tipo di boet. Sinembargo, mester expande e instrumentario di implementacion den otro leynan manera e ROPV, e ley di Construccion y Vivienda.

Pa garantisa un clima di inversion, y banda di dje un clima di biba y traha atractivo, Gobierno mester por actua preventivamente, pa para cu destruccionnan y kiebro di e Ley di Naturalesa. Unicamente si tin tur condicion na su luga lo por realmente ehecuta e implementacion di e proteccionnan. P’esey tambe ta esencial cu esnan encarga cu control y implementacion haya e preparacion debido y cu ehecucion di supervision y implementacion ta haya prioridad cerca Gobierno.

Stimula sector priva pa tuma trahadonan publico

Raad van Advies ta sugeri cu mester introduci y mantene e medidanan di estimulo fiscal

Gobierno tin intencion pa elimina e areglonan IPC (Imputation Payment Company) den e proyecto di ley den cuadro di reforma di belasting. Pero Raad van Advies no a propone compensacion. Esaki ta bay contra di e plan di maneho ‘Economic policy; A strong and resilient economy 2019-2022’ cu ta e vision y maneho di Gobierno.

Segun Raad van Advies, ta netamente actividadnan riba tereno di turismo medico, economia di conocemento, innovacion y sostenibilidad mester keda stimula segun e plan di maneho, pero pa cua a kita afo impulsonan fiscal. Hasta Fondo Monetario Internacional, IMF a conseha pa introduci areglonan fiscal atractivo, y Gobierno no a inclui esakinan den e proposicion di ley.

E ta keda crucial pa duna inversionistanan garantia, pa medio mantene di medidanan di impulso y no elimina esakinan sin un periodo di transicion.

Mas ainda ta propone un reduccion di inversion pa por re-educa personal, por ehempel door di reduccion di e suma di salario. Gobierno tambe por evalua pa implementa un pakete di estimulo pa asina sector priva tuma trahadonan di sector publico, enbez di introduci otro areglo di VUT (Vroegtijdig Uitdiensttreding).

Introduccion di medidanan pa limita daño na medio ambiente

Gobierno mester por introduci medidanan di belasting y tambe pa descurasha productonan, servicionan y industrianan cu ta menos duradero. Como tal, Raad van Advies ta kere cu mester stimula mas actividad economico duradero y den mesun rosea, den cuadro di promocion di economia duradero y un comportamento mas consciente di medio ambiente cerca consumidornan, demotiva actividadnan cu no ta duradero.

Lo por logra esaki pa medio di medidanan fiscal y areglonan di prohibicion. Como ehempel, Raad van Advies ta sugeri pa pone e belasting riba vehiculo den e accijns di gasolin y diesel. Di e forma aki lo por tuma un paso hopi simpel pa haci e emision di CO2 (gas cu ta contribui na cambio rapido di clima) mas caro y ta promove pa consumidonan scoge vehiculonan cu ta gasta menos combustible fossiel, por ehempel autonan electrico.

Mas ainda, un sistema di tarifa di importacion specifica riba mashin, medionan di produccion y autonan a base di sostenibilidad, en bes di e balor solamente, lo por contribui na un Aruba mas berde. Raad van Advies ta sugeri un structura tarifa di importacion pa medionan di transporte; mas gas nan ta produci, mas halto e tarifa di importacion. Por hasta bin un restriccion y kizas prohibicion di importacion riba vehiculonan cu no ta cumpli cu e standardnan di emision.