Rabia ta mal consehero

Tin ora entusiasmo tambe…

Gobierno a bolbe perde un caso den corte. No ta prome, y probablemente no ultimo tampoco. A menos cu bin un momento di reflexion kico ta pasando actualmente. Nos ta convenci cu un acercamento mas cuidadoso di e asunto di Lotto pa Deporte por a hiba e ministro concerni riba un caminda mas trabahoso, pero finalmente mas fructifero.

Tradicionalmente cada biaha cu gobierno cambia, nos ta bin topa e mesun problema aki, di gobierno nobo cu ta desea di reemplasa hende tur caminda cu nan mes hende. Tanten tur hende ta acepta esey, y hasta ta duna cualkier gobierno rason cu esaki ta e manera di actua, no tin problema. Asina nos por a mira na 2009 tambe cu e gobierno nobo, tambe rabia y cu exceso di entusiasmo, a manda notifica tur hende den cualkier directiva unda gobierno tabatin algo di bisa, pa nan pone nan puesto na disposicion di e ministro concerni. Masha bunita, tur hende a cumpli y esunnan cu no a cumpli a keda destitui di tur manera. Pero aki algo a cuminsa cambia. E partido berde ta conoci pa e hecho cu nan ta hopi mas planifica y strategico cu e otro partidonan, sigur ora ta trata di asunto cu segun nan preferiblemente no mester mira luz di dia.

Anto kico nan a pensa den e caso concreto aki? Cu algun dia nan lo mester bandona gobernacion, pasobra esey ta destino di tur partido. Naturalmente cu tur gobierno ta purba sobrevivi nan prome periodo, y tin biaha hasta e di dos, pero semper ta yega e dia cu bo mester bay. Anto kico nan a prepara? Un paso huridico pa crea mas distancia entre e mandatario di turno y e institucion, e persona huridico concerni. Nan a deshaci di e nombramento automatico di miembro nobo den e organismo, haciendo e trayecto pa yega na cambia e composicion di e Conseho di Supervision mas dificil. Esey ta algo malo? Depende con bo ta mir’e.

Laga nos bay un rato na origen di tur e asunto aki y esey ta e motibo pakico mundialmente gobierno(nan) ta crea institucion autonomo, y tambe empresa estatal. Esaki ta bao di e filosofia cu gobierno mes ta desea di tin un organismo cu un cierto grado di independencia for di gobierno, pa e por enfoca miho riba meta y interesnan di e organismo ey. Es decir, en principio esakinan no mester ta organismo unda cualkier ministro ta cana kibra riba un mainta bon tempran y ta parti ontslagbesluit pa henter e directiva. E principio di crea institucion cu ta at arm’s length di gobierno ta implica cu como gobierno bo mes no ta contradeci bo mes tratando di maneha e tipo di organismo aki como si fuera ta un departamento di gobierno e ta, pasobra si ta asina, anto bo no mester e crea nan mes… E principio di crea distancia no por bay nunca hunto cu pensamento di un politico cu ta kere cu ta djis un cuestion di ‘manda kita’ y cla! Esey ta un manera anticua di con pa eherce poder y influencia.

Ta con lo mester haci e cosnan aki anto? Sinta cu e directiva, confronta nan cu e plannan cu e mandatario tin y laga nan traha lealmente riba esey. Aha, anto exigi tur transparencia, y tur informacion riba cual e mandatario tin derecho. Y esaki no pa haya corta garganta, pero pa logra e maneho cu e mandatario tin pensa. Y si tin falta di colaboracion, o hasta sabotahe, e posibilidadnan pa interveni, y haya rason cerca hues ta bin di mes. Contal cu den e situacion cu e anterior gobierno a maniobra e fundacion, rabia no ta bon consehero y ademas, manera e hues ta indica cu su rason, e mero hecho di ta desea di pone ‘hende di confiansa’ pasobra gobierno a cambia, no ta suficiente argumento.

Pero, nos ta tende e comentario caba, na modo di papia: “Y pakico tur esaki no a sucede na un manera abierto, transparente, y no manera ladron den anochi despues di e resultado fatal di eleccion, cu a implica cu nan mester entrega gobierno?” Wel, por ta masha bon cu si nan a keda sinta como gobierno pa cuatro aña mas, nan lo no tabatin ningun pura pa pasa e cambio di statuto cu nan a haci na october pasa. Pero awor, haciendo uzo di algo cu nan por defende masha bon como un paso logico pa aumenta autonomia di e fundacion, tabata sumamente conveniente pa corta paso di e siguiente ministro, cu tabata demasiado orienta riba haci business as usual kitando hende pa pone otro. Bo por hasta yama esaki prostitucion di e filosofia di at arm’s length den e caso particular aki, pasobra si di berdad e partido berde tabata convenci cu bon gobernacion mester prevalece, lo nan a introduci esaki pa tur fundacion y tur empresa estatal, y haya aplauso di tur hende cu di berdad ta apoya principionan di bon gobernacion.

Sin embargo, no ta esey nos a mira di 2009 bin ariba. Y nan mester a sali di poder pasobra nan a viola tur principio di bon gobernacion. Gobierno nobo, cuminsa practica esaki.

You May Also Like

image.jpeg

Panama Papers y su consecuencia pa Aruba Sector ‘offshore’ tabata caba den extinsion

ORANJESTAD- Tur parti di mundo tin hende spanta pasobra nan nomber por aparece den ...

Ken ta sirbi ken?

Nos t’ey pa sirbi gobierno?   Un empresario, di un NV local, ta dicidi ...

CAft ta Positivo… Pero nos problema a bira menos?

For di comunicado y rueda di prensa nos por conclui cu CAft, despues di ...

Marisol como e ‘Messi’ di Aruba?

  Campaña electoral 2017 a cuminsa, esey nos por bisa sigur. Ya caba nos ...

Den caso di Citgo tambe…

Emocion ta mal consehero! Ora nos a kere cu e stof cu a lanta ...

Curaçao riba crusada peligroso

E situacion politico na nos hermana isla ta tumando un rumbo sumamente peligroso. Gobierno ...