Rainbow Warriors Core Foundation como organisacion internacional pa desaroyo sostenibel cu sede na Aruba, cu ta enfoca riba investigacion cientifico y ingenieria aplica ta boga pa yega na un desaroyo sostenibel na Aruba, envolviendo tur stakeholder den dialogo y tomo di decision pa desaroyo sostenibel den tur tres area, esta economico, social y ecologico.
Recientemente Gobierno di Aruba a tuma e decision pa prohibi uso y estacionamento di e-bikes y e-scooters den areanan publico y den sector turistico en particular.
Aki Gobierno diripiente a desvia di e situacion di tolerancia di basta aña, cual a crea un situacion na unda e asina yama “gewoonterecht” ta bira aplicabel.
Comokiera cu Aruba Birldlife Conservation Foundation, aparentemente un “one-man-show” di Greg Peterson, a dicidi di hiba Gobierno di Aruba y Aruba Conservation Foundation corte 26 mei proximo pa stop ATV y UTVs opera den areanan cu ta keda pa puro coincidencia alrededor di Tierra del Sol, un propiedad di e cadena IberoStar, cu cual Greg Peterson y su fundacion ABC tin un multi-annual partnership mediante IberoStar Foundation, awor dos sector esta di esun di ATVs y UTVs y esun di e-bikes y e-scooters ta ser afecta economicamente cu un obvio menasa pa empleo den dicho dos sector.
Pasobra desaroyo sostenibel tambe tin un componente economico y un componente social, cu tin igual peso na esun ecologico, Rainbow Warriors Core Foundation ta kere cu tur e stakeholder envolvi mester por defende e interesnan economico y social, pero tambe na e mesun momento asumi nan responsabilidad ambiental.
P’esey nos organisacion ta haci un yamada na ambos sector pa conveni reunion cu nos y algun instancia invita pa discuti e creacion di un convenio y codigo di conducta pa sostenibilidad den cual tur tres componente di desaroyo sostenibel ta ser hancra asina sigurando siguridad di empleo y na mes momento garantisando e aspecto di proteccion ambiental y proteccion di naturaleza.
E intencion ta pa conveni reunion pa yega na un convenio y codigo di conducta apart pa cada sector.
Y nos ta haci un apelacion na tanto gremio comercial como sindical pa apunta representante pa sirbi como observador den dicho dos reunion.
Por yama Sr. Milton Ponson, presidente di Rainbow Warriors Core Foundation na 747-8280 pa mas informacion y of pa yuda organisa e reunionnan menciona.
Nota di redaccion: E articulo aki ta opinion di e autor y no ta representa opinion di Bon Dia Aruba.
