RAIZ ta propone Plataforma Nacional multisectorial y multidisciplinario

Pais Aruba ta riba bon caminda pa supera e obstaculo enorme cu nos ta confrontando. E crisis actual a expone varios debilidad di nos economia como tambe nos forma di biba. Sinembargo, sobrevivi e crisis aki no ta suficiente.

E Aruba nobo despues di crisis no solamente ta exigi tur partido politico pa sinta hunto, pero tambe e participacion activo di comercio, sindicato, henter nos comunidad. E tempo di trato preferencial y saca probecho a pasa. Tur instancia, cada ciudadano lo mester coopera pa diseña e Aruba nobo… ningun di nos lo sali ileso for di e situacion cu nos ta bibando aden. Y si nos no uni nos vision y intencionnan pa caba, ta Den Haag lo dicidi pa nos. Den Haag ta dispuesto pa yuda, pero e muchanan mester cuminsa na stop di pleita y scucha otro.

Sigur, nos tur kier pa nos Aruba bolbe prospera. Y nos ta comparti e vision cu Aruba mester sali for di e crisis aki mas grandi y mas fuerte ainda. Como movimento social democrata progresivo, RAIZ kier contribui directamente. Ta hunto so nos ta yega na un economia sostenibel y duradero, cu reparticion husto di e bienestar general.

RAIZ kier mira accion wordo tuma mas pronto cu ta posibel. Nos kier mira gobierno tuma pasonan concreto pa introduci un Plataforma Nacional multisectorial y multidisciplinario. Multisectorial pa por mira tanto sector publico, sector comercial y sector social colabora na e Plataforma Nacional y multidisciplinario pa asina profesionalnan di diferente disciplina contribui na e plataforma proponi aki.

E Plataforma Nacional mester consisti di conocemento procedente di e miho celebronan cu tin riba nos isla. Nos tin hopi ciudadano cualifica y educa cu por forma parti di e plataforma aki. E plataforma no mester bira un encuentro politico sino trece nos profesionalnan hunto pa asina nan por pone nan experticio den practica.

RAIZ ta ofrece su contribucion na un forma sano, honesto y madura. No tin miho momento pa reenforsa union nacional. Ta awor ta e momento husto pa canalisa bon intencion, curiosidad, talento, sabiduria, energia y creatividad pa hunto nos desaroya e Aruba nobo cu nos tur ta depende di dje.