Fecha final ta dia 1 di september pa entrega rapport di gastonan pa locual ta dañonan causa di derame di azeta na nos costanan algun luna atras. Loke nos a compronde for di departamentonan concerni manera Rampenbureau, esaki no ta cla ainda.

Gobierno a bisa cu lo bay recobra daño pero prome ta bay haci un inventarisacion. Na kende y cuanto lo bay recobra, no ta cla. Nos a tuma contacto cu minister di Asuntonan Economico Richard Arends kende a laga sa cu e mester revisa con leu cos ta bayendo cu e departamentonan concerni. Asina cu e sa algo e ta comparti cu nos. Ultimo nos a compronde cu esakinan mester a keda cla pa 25 di augustus pa entrega na gobierno. Pa asina e rapport completo ta finalisa riba 1 di september. Rampenbureau mester compila tur e informacion di tur gastonan y daño di tur departamentonan concerni y traha e proces-verbaal.

Rampenbureau
Nada no a cambia, no tin ningun cifra ainda, Rino Hermans di Rampenbureau a confirma na Bon Dia awor. E ta proceso cu ta tuma y exigi hopi tempo pa finalisa, e ta sigui bisa. Sr. Hermans ta agrega cu tur departamento mester ta trahando riba dje y cu nan mes no a duna ultimo dia ainda pa entrega.

Parke Arikok
Nos a tuma contacto cu Parke Arikok kende tambe tabata forma parti di e crisis team cu a yuda haci limpi na nos costanan. Nan tambe mester a entrega un claim. Despues di e ultimo deramenan, nan a sigui cu limpiesanan pa dos luna largo. Nan a bay un biaha mas tambe cu DNM (Dienst Natuur en Milieu) pa inspecta e beachnan unda dado momento e contaminacion tabata riba un nivel abou cu a duna ok pa habri e beachnan bek.


Situacion actual
Riba 12 di juni nos a publica cu e situacion di derame di azeta na nos costanan ainda tabata un calamidad. Dos dia despues Rampenbureau ta baha esaki di intensivo pa pasivo. Nan a informa nos algun dia despues di esey cu nan lo sigui cu un limpiesa di monitor te cu 20 di juli pero ta continua cu un langdurige monitor di nos costanan pasobra: Experiencia ta bisa cu 6/7 siman no ta suficiente, bo tin cu keda monitor pasobra bo no sa cuanto tin den e awa. Si yega asina leu cu por ehempel tres luna ta pasa y no ta haya tarballs, e ora ta yega fin na e operacion akinan. Hopi area a keda sushi ainda, bao santo y riba piedranan. Pero manera cu nos a informa caba, segun Rampenbureau no mester mishi cu esaki a base di recomendacion y escogencia di expertonan di exterior (Oil Spill Response Limited di Fort Lauderdale). Esaki sr. Hermans a splica nos algun siman pasa, enfatisando e tempo ey tambe awor cu crudo ta un producto natural y naturalesa mes lo ahusta su proceso di medio ambiente.