(DutchNews) – Rapporteur special di Nacionnan Uni (ONU) tocante tortura a bolbe publica un parti di un video anterior unda cu ta mustra 2 miembro di cuerpo oficial Hulandes atacando un manifestante, describiendo esaki como “un di e escenanan mas repugnante di brutalidad di polis cu el a yega di mira desde e incidente cu George Floyd.”
Sinembargo, e video den e publicacion haci pa Nils Melzer, titula “urgente” y dirigi na e Ministerio di Buitenlandse Zaken, a ser tuma na Den Haag aña pasa.
E video ta mustra un solo manifestante ricibiendo golpi di miembronan di cuerpo policial cu baton y un cacho parti di unidad K-9, cual a causa controversia na Hulanda na momento di su publicacion riba rednan social.
Den e publicacion aki riba e red social Twitter, Nils Melzer ta bisa cu e “comportamento salvahe aki mester stop aki y awo” y cu e lo manda un nota oficial di protesta na Gobierno Hulandes dentro di poco. Tambe el a haci yamada pa cuerpo policial y nan superiornan ricibi cargo penal.
Sinembargo, esaki ya caba ta tumando luga. Den december, e departamento publico di persecucion a anuncia cu dos miembro di cuerpo policial ta enfrentando cargo pa uso di violencia excesivo, cual e departamento a declara tabata desproporcional.
Varios persona a cuminsa señala cu e video aki ta bieu, y cu e no a ser graba durante diadomingo su protesta ilegal na Amsterdam. Riba dialuna, Melzer tambe a bolbe publica un clip di e protesta aki unda cu un manifestante a ser ataca pa cacho.
Den e publicacion aki, el a invita victimanan, testigonan y NGO pa publica y trece dilanti “evidencia verificabel” tocante e incidente den preparacion na su bishita oficial na Hulanda den aña 2022, cual el a bisa lo enfoca riba violencia di cuerpo policial.
DutchNews.nl a pidi ONU y Melzer pa duna comentario tocante e palabranan fuerte publica y su fuentenan.
Un vocero di cuerpo policial a conta noticiero NOS cu e ta desapunta cu Melzer a haci declaracionnan asina fuerte a base di algun imagen.
Cabesante di Union di Cuerpo Policial Gerrit Van de Kamp a bisa cu e rapporteur di ONU su declaracion ta completamente “individual y solamente ta representa su persona.”
“Na Hulanda nos tin e custumber di haci investigacion prome cu nos husga,” Van de Kamp a expresa. “Aparentemente, ya caba el a yega su conclusion.”
