“Honestamente, mi ta sinti cu Aruba no tin un tradicion pa caba cu tur detaye debidamente.” Esaki Profesor dr. Raymond Gradus, Presidente di College (Aruba) Financieel Toezicht, CAft a bisa Bon Dia Aruba.

A tene un combersacion cu dr. Gradus e siman aki, despues cu e conseho riba e concepto di Presupuesto 2021 a keda presenta y alabes cu a publica un carta unda a pidi pa cuentanan anual di 2019 di tur entidad publico, y fondonan di presupuesto.

E motibo pakico e cuentanan anual ta importante ta pasobra nan ta duna un bista con nan por afecta fondonan publico y kico por haci pa mitiga e risiconan pa Gobierno.

“Mester tin mas atencion pa cuentanan anual, ta locual Profesor dr. Raymond Gradus a bisa Bon Dia Aruba. “Nos a papia riba e tema aki durante nos ultimo bishita siman pasa.”

CAft ta mustra su satisfaccion cu Gobierno a cera su cuentanan anual di 2016 pa 2018, pero “nos ta pendiente pa e cuenta anual di 2019 y ta spera di por ricibi e cuenta anual di 2020 pa 31 di Augustus 2021. Esey ta describi den e Landsverordening Aruba Financieel Toezicht, LAft y tambe e ley di Comptabilidad di Aruba.”

Raymond Gradus a bisa cu e ta sinti cu na Aruba no tin e cultura pa finalisa tur e detayenan administrativo cu ta haci posibel pa controla e cifranan.

“Mi sa cu den pasado no tabata ni hinca un cuenta anual den otro, sigur no despues di Status Aparte. Esey en todo caso a cambia, pero mester bin mehoracion tanto cerca Gobierno y na entidadnan publico, incluso companianan di Gobierno.”

Balor cuenta anual

E tabata sorpresivo pa lesa cu hasta organonan halto di conseho manera un Raad van Advies no a presenta nan cuenta anual di 2019, pero pa e Presidente di CAft, tin algun instancia cu ta rekeri mas atencion cu otro. “E no ta parce mi hopi dificil loke nan mester haci, pero mi ta papia mas den su generalidad, cu mester tin mas atencion.”

Un cuenta anual no ta unicamente procedura. E ta ilustra un proceso cu tin influencia pa e siguiente presupuesto di Pais Aruba. Gradus a uza como ehempel financiamento di estudio. Datonan concreto ta ilustra e proceso di e otorgamento y pago di financiamento di estudio cu despues ta bira un punto valioso pa e siguiente presupuesto. “P’esey nos ta pone hopi balor na e proceso.

Falta di Cuentanan Anual

Aruba a cuminza produci su cuentanan anual apenas den decada di 2010. CAft a bira un hecho na 2015 y tabata rekeri pa haya e cuenta anual di Gobierno, y aunke cu nan no tabata produci na tempo, poco poco a cuminza ricibi nan.

“Nan lo mester por bin mas lihe. Pero mes importante cu un cuenta anual ta e declaracion di accountant,” dr. Gradus a enfatisa.

Aruba a cuminza traha riba e aspecto aki cu SOAB, esta Stichting Overheidsaccountantsbureau, Esaki ta nifica cu e accountant ta bay firma cu tur e proceso a bay segun regla.

“Den mi bista, e mester ta parti di dje (cuenta anual). E ta importante den cuadro di transparencia.” Gradus no ta sinti cu deliberadamente ta purba sconde dato, pero ta reconoce si cu mester tin claridad.

Realidad ta cu pa medio di cuentanan anual, ademas di un control y declaracion di accountant por descubri fayonan den maneho financiero y por coregi nan na ora.

Serlimar

Durante e bishita di CAft na Aruba, a pone atencion na Serlimar. A tene combersacionnan cu Mr. Geert Rep cu ta apunta como Curator y tambe cu directiva y hunta di comisario di e compania.

“E forma con a hiba e maneho financiero den pasado, ta duna muestra cu a perde caminda y e ta hopi ilustrativo. Serlimar a ricibi fondonan publico di forma inaceptabel.”

Profesor Gradus no ta compronde con por permiti cu clientenan a keda sin paga nan cuenta sin mas, y con e falta di un bon maneho a costa fondo publico.

“Mi impresion ta cu e aña aki ta bay cuminza cobra, pero tin hopi caminda pa cana, pa percura cu e compania ta hiba su maneho na un forma adecuado, unda no tin metemento politico.”

E Presidente di CAft no ta duda cu pa hopi tempo tabatin metemento politico den Serlimar. Y locual tambe ta sosode, sea pa motibo di politica of no, e ta di opinion cu tin hende ta cana rond cu no ta traha na interes di e compania.

“Mi ta formula esaki hopi skerpi,” e ta admiti.

Como tal e bishita na Serlimar tabata importante pa miembronan di CAft y segun Gradus, den e proximo añanan mester bin mas atencion y esey ta menciona tambe den e landspakket.

“Pero for di mi funcion, mi ta bisa cu mester bin ‘Good Corporate Governance,’ esta bon maneho corporativo cu su codigonan y tambe bin bon regla pa dividendo y locual mi mes ta haya, mester bin un atencion na locual ami ta yama ‘bleeders,’ (heridanan cu ta keda sangra) y Serlimar ta un di nan. No por atende cu tur cos pareu, pero Serlimar ta uno hopi importante pa percura cu e sangramento por para eynan.”

LEAVE A REPLY

Please enter your comment!
Please enter your name here