Aruba no ta para su so, pero e reformanan cu mester tuma pa haci e pais economicamente fuerte y baha e debe enorme ta keda den man di Aruba mes. Pero tur hende na Aruba, particularmente esnan cu tin trabou, mester ta solidario cu otro, pasobra e necesidad ta grandi y lo keda asina pa un tempo.

Esey ta e mensahe di Secretario di Estado Raymond Knops ayera. Knops tabata na Aruba pa dos dia unda el a reuni cu diferente instancia, incluso cu grupo di personanan sin entrada. Pero mas bien, su enfoke tabata pa mira con leu Aruba ta cu e palabracionnan cu a yega na dje na November ultimo. Y segun e Secretario di Estado, e ta satisfecho.

Knops manera ta conoci a reuni cu diferente instancia manera Dr. Horacio Oduber Hospital, AHATA, Fundacion Pa Nos Comunidad, otro organisacionnan y tambe Gobernador. Y a reuni cu henter Conseho di Minister pa asina haya un miho bista riba e trabounan cu ta tumando luga den cuadro di e landspakket cu mester cay bou supervision di e entidad Caribense pa Reforma y Desaroyo, COHO.

Knops a bisa cu e ta contento cu a pesar di momentonan di diferencia, a tene contacto continuo cu otro desde Juli. E temanan di discusion tabata di inversion, reformanan y e necesidad pa haci esaki hunto. Knops tambe tabatin encuentro cu algun persona cu realmente ta sin entrada y ta depende di e ayudo di emergencia cu Hulanda ta manda. “E impacto na Aruba ta mas grandi cu Hulanda y Europa. Tur hende tin efecto di COVID, pa cuminza esnan afecta pa e virus. Mi a bishita hende cu simplemente no tin nada, cu lo kier traha, pero no tin nada. Tin 30 mil hende cu ta depende di sosten di cuminda. E ta nifica cu otronan cu si tin trabou mester tin solidaridad y duna un contribucion. Na e momentonan aki e ta ‘all hands on deck.’

Solidario

E Secretario di Estado a urgi pa hinca esfuerso den e reformanan pa brinda perspectiva pa futuro. Knops a bisa cu pa loke salud, lo sigui enfoca riba colaboracion y el a haya bon mensahe di su bishita na dr. Horacio Oduber Hospital. “Pero ningun hende sa exacto ki tempo e pandemia ta tras di lomba of ki dia e economia lo recupera. Consecuentemente, Arubianonan cu si tin trabou mester sigui mustra solidaridad. Esnan cu no tin nada, tambe tin derecho di existi. Y nan a pidi mi pa sigui cu e ayudo. Y nos ta bay haci esey hunto cu Gobierno di Aruba.”

Aunke cu e mes no a mira e carta habri cu sindicato ABV a manda pa su persona, pa stop e reduccion den salario di enfermeronan, Knops ta enfatisa e aspecto di solidarismo cu otro Arubiano. Consecuemente, organisacionnan cu tambe tin funcion publico manera FCCA, APFA y Banco Central di Aruba cu te awor no a entrega parti di salario, mester bira parti di discusion cu Gobierno. “Ningun hende por keda sin contribui. E tin di haber cu imagennan di hendenan cu ta cu lomba na muraya. Ta pidi tur hende pa duna un contribucion. Un FCCA ta haci un trabou publico, cu mester contribui. Banco Central ta un organisacion independiente, y ta awor numa lo bay papia cu Gobierno riba e rol di instituto den e solidarismo aki.” En todo caso Knops ta haya cu Banco Central tin un funcion di ehempel, pero mester discuti e punto aki cu Gobierno ainda.

Cruz Cora

Locual ta bisto pa Hulanda y pa Raymond Knops ta cu e ayudo di emergencia pa esnan cu a keda sin entrada y sin trabou, a bira mas bien ayudo structural, y como tal Cruz Cora ta keda e instancia cu por keda coordina e proceso, banda di FPNC y otro organisacionnan boluntario cu ta hinca nan oranan pa yuda esnan cu a keda sin nada.

Knops a ripiti su satisfaccion cu Hulanda no a duda pa duna sosten medico y di cuminda pa tur esnan cu ta afecta. “Nos ta hopi pendiente kico ta pasa na Aruba, y si mester papia di vacuna, of con ta bay traha riba economia, semper ta papia di e cuater paisnan den Reino.”

Medidanan t’ey pa hopi tempo

Berdad Aruba a tuma como prome, e medidanan duro pa por haya sosten di Hulanda. “Mi kier bisa Aruba, cu mester compronde cu Gobierno di Aruba mester sigui cu e medidanan aki.” Knops a bisa cu tin asina hopi hende sin trabou, cu mester sosten, Pero e problemanan di Aruba no ta solamente pa motibo di COVID-19, sino pa motibo di un maneho financiero cu a hiba e isla na un debe insostenibel. Hulanda como tal ta cla pa sostene Aruba den reforma y reforsa su economia door di diversifica esaki, pero e ta bay rekeri sacrificio di tur. “Aruba ta autonomo desde 1986, a logra hopi di e tempo ey. Pero dificilmente Aruba por surpasa e crisis aki su so.”

Den siguiente fasenan di sosten di likides lo brinda ayudo tecnico tambe, pero na final, ta e lidernan di e pais y su hendenan mes mester tuma e pasonan necesario, entre otro door di acepta e medidanan pisa cu mester keda pa e tempo necesario. “E medidanan aki no ta pa Prome Minister ni mi persona, sino pa tur cu ta traha, biba aki. Pa e generacion.”

Cortamento den cuido

Cuido ta un sector esencial, mescos cu enseñansa y husticia. Hulanda como tal lo sigui yuda duna sosten den e crisis di COVID-19. Pero tin espacio den cuido cu pa medio di cooperacion lo por baha gastonan. E idea ta cu Hulanda lo yuda Aruba cu e proceso di vacuna cu ta cuminsa na Februari y cu pa Juni, Juli, un porcentahe grandi di e populacion lo ta vacuna contra COVID-19 pa permiti asina cu e presion riba cuido medico bira menos pero cu economia por cuminsa draai sin e medidanan atrobe. Si hendenan tuma vacuna ta baha e presion riba cuido medico, y tanto Knops y Prome Minister Wever Croes ta kere cu asina cu e programa di vacunacion ta conoci cu mas hende lo ta dispuesto pa tuma esaki. Segun Prome Minister Wever Croes., a ripara cu na Hulanda, e disponibilidad di comunidad Hulandes pa tuma e vacuna ta creciendo.

Pero riba su mes, e crisis di COVID-19 a mustra si cu por mehora cuido,” door di traha mas sabi y evita gastonan innecesario. P’esey a scoge pa corta den cuido y no den husticia. Cuido agudo ta keda na nivel si,” Knops a sigura

Reduccion di debe

Na fin di 2018, Hulanda y Aruba a bay de acuerdo cu e debe di Aruba tabata mucho halto y a haci palabracionnan con pa baha esaki. E realidad di e pandemia ta cu el a empeora e posicion di debe di Aruba mas ainda, y mester revisa e palabracionnan. E problema di debe ta cu un dia mester paga nan. E unico manera pa paga e debenan ta pa realisa un crecemento economico. Ningun hende sa con esaki lo sosode. E idea di baha e debe di Aruba na 50 porciento den un par di aña ta uno ambicioso berdad, e ta e obhetivo. Pero tin hopi insiguridad. Locual si nos sa ta cu mester bin reforma pa permiti crecemento y asina cuminsa paga debe. Esey no a cambia. E quota di debe di Aruba ta asina malo cu ta keda depende di Hulanda. Y e unico manera pa cambia esaki ta reformanan

COHO

Pa loke ta COHO y e landspakket, tanto Hulanda como Aruba ta trahando segun e palabracionnan, Knops a sigura. E no ta un tarea facil pasobra ta un plan cu mester ehecuta den corto plaso pero unda tur envolvi ta hinca nan esfuerso. E ta rekeri hopi di esnan di e aparato publico, di ambos banda, pa hinca e palabracionnan den plan concreto y tambe disponibilidad politico. “E no ta bay ta facil tur ora. No por kere cu ta keda haci e mesun cos y spera otro resultado.”

Den otro palabra, e idea tras di e landspakket ta rekeri ahustacion politico y tambe cambionan den ley. Tanten cu no tin e consensus rijkswet no tin e COHO. Pero asina mes a cuminza traha riba e proposicionnan den e landspakket, cu despues mester keda formalisa den ley. E ta rekeri di tur, incluso Parlamento pa haci su contribucion. “E ta hopi trabou y ta pone mas peso banda di e trabou regular. Pero e ta necesario, pasobra e necesidad ta grandi.”

E reformanan y inversionnan ta encera un aparato publico mas flexibel y menos burocratico cu ta stimula inversion priva, cu mester haci Aruba menos dependiente di turismo. “Esaki no ta un proyecto di un aña, sino ta uno di largo plaso.” Knops a sigura cu esnan cu ta cualifica y tin afinidad cu e region lo forma parti di COHO.

Bon ricibi

Secretario di Estado Raymond Knops a bisa cu el a sinti su mes bon ricibi na Aruba y su encuentronan cu entre otro e gremio medico a dun’e hopi speransa cu tin area pa coopera miho ainda cu otro, cu por baha gasto na interes di tur. E ta su tarea pa percura cu tin continuacion na e palabracionnan cu Aruba a haci cu Hulanda, cu ta rekeri esfuerso di Hulanda y Aruba, entre otro pa organisa henter e proceso.

Prome Minister Evelyn Wever Croes di su banda a bisa cu ta hopi gradicido pa tur e sosten cu Hulanda a duna Aruba durante e pandemia. E impacto ta enorme y ta continuo y “nos mester papia di suerte cu a pesar di tur cos cu nos por a haya ayudo di Hulanda, pa por a surpasa e partinan duro.”

Mientrastanto Secretario di Estado Raymond Knops ta na St. Maarten pa e reunionnan riba sosten y reforma.