Algun ‘deadline’ den agenda di ehecucion tabata mucho ambicioso

Debe di Aruba lo yega na 5.6 mil miyon florin na fin di 2021. Den comparacion, e debe di Corsou ta 4.6 biyon cu ta 1.3 biyon menos cu esun di Aruba (red. A pesar cu Hulanda na 2010 a elimina gran parti di debe di Corsou y St. Maarten). St. Maarten lo cera 2021 cu un debe nacional di 1.7 biyon florin. Asina Secretario di Estado Raymond Knops a informa Tweede Kamer ayera durante tratamento di e presupuesto di Islanan BES y Asuntonan di Reino.

Durante e reunion, Secretario di Estado Knops a contesta diferente pregunta cu el a ricibi por escrito y hopi tabata dirigi riba maneho di Gobierno Hulandes pa e Islanan BES, pero asina mes tabatin hopi pregunta riba e situacion economico di e paisnan CAS, Corsou, Aruba y St. Maarten.

COHO

E Secretario di Estado a splica e progreso di rijkswet COHO y si a haci e gastonan caba pa COHO cu tabata calcula na 607 mil euro pa 202. Knops a splica cu Conseho di Minister di Reino a aproba e concepto di rijkswet COHO na September y ta den deliberacion cu e Gobiernonan di e paisnan riba e ley. E intencion ta pa entrega e ley mas lihe posibel na Tweede Kamer. Pa loke ta e gasto di 607 mil euro, esaki ta trata gasto di personal cu ta conta pa 2021 y 2022. A uza fondonan caba pa paga esnan den e asina yama Tijdelijke Werkorganisatie, TWO cu ta anticipa e COHO.

Progreso landspakket y cumplimento di condicion

E Parlamentarionan Hulandes tabata interes den e resultadonan di e landspakketnan y e progreso cu condicionnan cu e paisnan CAS mester a cumpli cune pa ricibi sosten di likides.

Segun Knops, desde cu a firma e areglonan interno, a logra concretisa 45 plan di accion, cu ta percura pa e revisionnan cu ta e base riba cua e medidanan mester keda ehecuta. Pero ya caba, segun Knops a logra adelantonan, riba tereno di belasting, sector financiero y fortificacion di estado di derecho. Por ehempel, e leynan pa evita labamento di placa, proposicionnan pa mehora supervision di sector financiero y e protocol pa fortificacion di cuido di frontera. Pa loke ta e condicionnan, ainda mester tuma paso pa un reduccion temporario riba condicionnan laboral y establece norma pa entradanan halto. CAft a constata tambe cu no a logra suficiente den implementa e reduccion di salario den entidadnan cu ta mara na Gobiernonan di e paisnan CAS.

Falta capacidad pa cumpli

E Parlamentarionan Hulandes tabata kier sa di con e paisnan tin problema cu cumpli

cu algun di e condicionnan aki, pero pa Knops e no ta cuestion di tin problema sino di ehecucion. El a ripiti cu e condicionnan di Conseho di Minister di Reino, mara na sosten di likides tin como meta pa hisa resiliencia financiero-economico di e paisnan. Hopi di e condicionnan mester keda ehecuta a base di cambionan di ley of introduccion di ley nobo. Y ta aki ta unda tin limitacion riba e paisnan. P’esey mes, Hulanda ta brinda asistencia tecnico pa atende structuralmente cu e buraconan den capacidad di legislacion. Na momento di evalua con ta cumpli cu e condicionnan ta tene cuenta cu e complehidad di ehecucion di e medida, e importancia di cautela y e nivel cu e paisnan berdad por tin influencia riba e progreso. “Nos no ta castiga e paisnan si no logra e deadlines, particularmente si e no ta en parti of completamente den nan man. Si e circunstancianan ta duna, lo extende e exigencia pa cumplimento. E situacion financiero-economico sinembargo ta pidi si pa diligencia den ehecucion di e reformanan palabra.”

Di otro banda, e Secretario di Estado ta admiti cu algun di e deadlines tabata mucho ambicioso y mester a keda ahusta, mientras cu den algun caso, tabata falta e capacidad pa ehecucion den e paisnan tabata. “E progreso riba e ehecucion di landspakketnan en general na Corsou ta preocupante. Pa Aruba, e cumplimento cu medidanan cu mester produci recorte den cuido no ta suficiente y pa St. Maarten, e retraso ta riba mehoracion di e condicionnan di detencion.”

Maximo debe mester ta na 55 porciento di PBI

Cu e situacion ta serio ta ilustra den e debenan di paisnan CAS. Pa Aruba, e debe ta na 114 porciento di e Producto Bruto Interno, compara cu 91 porciento di Corsou y 79 porciento di St. Maarten. “Basa riba entre otro un estudio di IMF, cu na momento cu e debe di un economia di isla chikito ta riba 55 porciento di e PBI, e tin efecto negativo pa desaroyo economico di e pais. E quota di debe di tur tres pais autonomo den Caribe ta excede e norma aki. Reduccion di e debe nominal lo sosode pa medio di crea surplus riba presupuesto. Esaki ta posibel si baha gasto of hisa nan entrada, pa medio di mehora cobranza di belasting. Banda di esey, e reformanan economico lo yuda crecemento economico. Esaki lo tin un efecto positivo pa entrada di belasting y lo reduci gastonan publico.” Knops a subraya cu a palabra cu Aruba pa baha debe y realisa un surplus financiero riba presupuesto den e protocol di November 2018. Y banda di e palabracionnan aki, e prestamonan cu e paisnan a cera ta cu Hulanda. Unabes cu ta paga esakinan, e debe lo baha tambe.

Aruba mester corta 60 miyon den AZV

E consecuencianan concreto pa e paisnan cu tin problema pa cumpli cu e condicionnan ta cu Hulanda lo no duna e siguiente sosten di likides. Ya Hulanda a haci esaki dia 24 di September ultimo ora cu a para e sosten pa Corsou pasobra no a ni traha e agenda di ehecucion pa e di cuater kwartaal di 2021 y tabatin poco adelanto riba e aspectonan mas importante den e otro agendanan di ehecucion. “Pa Aruba tambe a dicidi pa wanta e sosten di likides te e siguiente Conseho di Minister di Reino. Como condicion pa a ricibi e di siete tranche di sosten di likides, Aruba cu ayudo di CAft mester a presenta un plan di accion con ta bay baha gasto di AZV cu 60 miyon florin. Gobierno di Reino a constata cu Aruba no a cumpli cu e condicion aki. Banda di esey, Aruba tabata den combersacion ainda cu CAft riba e necesidad di likides durante e tratamento den Conseho di Minister di Reino. A palabra cu Aruba lo presenta un plan adecuado pa e siguiente reunion, cu ta inclui con ta bay corta 60 miyon den AZV pa 2021.”

Refinancia debe internacional di Aruba

E Parlamentarionan Hulandes tabatin pregunta specifico pakico Hulanda a reserva fondonan pa 2022, cu ta destina como prestamo pa Aruba. Raymond Knops a bisa cu e medionan aki ta reserva pa asina Hulanda por refinancia e debenan internacional cu Aruba tin y cu mester paga na 2022. E refinanciamento aki via Hulanda, cu ta inclui e debenan di 2021, lo permiti Aruba spaar como 40 miyon euro.” E refinanciamento di parti di Hulanda tabata palabra durante e negociacionnan pa e di tres tranche di sosten di likides na 2020. Pa ta e refinanciamento di e sosten di likides cu e paisnan a haya pa 2020 y 2021, esta e asina yama ‘bulletleningen’ na cero porciento, Knops no kier a bisa mucho. “Ta cuminza e discusionnan cu e paisnan e luna aki. Mi no por anticipa riba e combersacionnan.”

Recuperacion economico

Pa ta e prognosis di recuperacion di economianan di Corsou, St. Maarten y Aruba, Knops a bisa cu turismo, e entrada principal di e paisnan a cuminza lanta atrobe. Segun IMF, e economia di e paisnan aki lo subi cu cero porciento, cuater porciento y cinco porciento respectivamente na 2021. Pa 2022 ta calcula un crecemento mas acelera di 6.5 porciento, 15 porciento y 12 porciento respectivamente. E turismo riba e paisnan CAS lo yega na nivel pre-pandemia na 2024. Sinembargo, e prognosis di crecemento tambe ta mara na inseguridadnan halto. E hecho cu e pandemia ta keda fuerte por trece risiconan pa mas caida. Banda di esey, e recuperacion economico ta mara tambe na con y con lihe e paisnan ta implementa e reformanan structural manera ta poni den e landspakketnan.

Tanto islanan BES como paisnan CAS tin acceso directo na fondonan Europeo. Como pais LGO, esta Pais y Teritorio Ultramar di Union Europeo, por participa den e fondo di 500 miyon euro cu Union Europeo a pone disponibel pa e periodo 2021-2026. Islanan BES, esta e paisnan LGO di Hulanda ya caba a entrega Programanan Indicativo Multianual na Comision Europeo. E proyectonan aki mester ta relata na sostenibilidad, cu ta e punto di e salida di Comision Europeo. Banda di esaki, e paisnan LGO por tin acceso na diferente otro programa di subsidio Europeo manera Horizon Europe, Interreg Carribean, Life+/BEST 2.0+ e programa Energia Sostenibel y Programa di Biodiversidad Marino. Pa esaki ta conta si cu e paisnan mester busca un partner den Union Europeo pa entrega peticion, cu ta hopi biaha den practica ta resulta un barera. Empresarionan ademas por bin na remarca pa subsidionan RVO (Rijksdienst voor Ondernemend Nederland), manera areglonan dirigi riba innovacion den e area di clima y energia.

Di otro banda, e Parlamentarionan Hulandes tabata kier sa di ki forma a pone atencion na innovacion riba tereno di sostenibilidad y e pasonan contra cambio di clima. Raymond Knops a bisa cu e landspakketnan ta trata un area amplio di reforma y inversion cu mester contribui na resiliencia y fortifica economianan y e comunidad di e paisnan. Aunke cu sostenibilidad y tuma medida contra cambio di clima ta importante, nan no a keda inclui explicitamente como tema riba nan mes den e landspakketnan,” Knops a informa. E no a splica dicon.

 

LEAVE A REPLY

Please enter your comment!
Please enter your name here