E prome wega semi-final tabata dialuna anochi ora RCA y Nacional a enfrenta otro pa mira cua di dos lo bira e prome finalista diasabra awor.

Prome tempo
Den e prome minuutnan RCA a tuma e iniciativa y cu leve dominio a yega dos biaha na e gol di Nacional cu bon atake ehecuta. E prome tiro riba gol a bini pa medio di Erik Santos cu portero Jose Cruz ta tapa despues den un tremendo atake e combinacion Baromeo y Bergen a hera caba den un gol tricolor pero e bala di Bergen ta pasa net na banda. Segun e wega ta avansa Nacional a drenta den e wega den nan prome bon atake un tiro lastra di Devis Oliveros ta pasa net na banda di e gol defende pa Abdul.

Mester bisa cu dado momento e wega a bira emocionante unda e arbitro principal mester a pone ordo pa esaki no bay for di man. Un atake di Baromeo por poco ta drenta gol ora cu e ekipo di Nacional ta paralisa pa un presunto infraccion pero e arbitro ta laga e wega sigui normal. Un prome tempo caminda no mucho bon futbol demostra pa ambos ekipo, perdida di bala y pasonan malo tabata demasiado esaki a debilita e bon wega di tur dos team.

Sinembargo e bon wega di ambos a sosode den e ultimo 5 minuut di e prome tempo.

Na di 40 minuut, Jean Luc Bergen ta habri e marcado 1 – 0 cu un tremendo tiro liber cu portero Jose Cruz no por a haci mucho cune. Dos minuut despues tabata Devis Oliveros di Nacional cu ta empata e wega 1 – 1 ora cu e defensa di RCA no a rechasa e bala y esaki ta cay den pia di Oliveros cu no a pordona unda e ta los un misil riba gol cu Abdul a para wak drenta.

Dos tempo
Den e di dos tempo e wega a bira mas lihe y sigur mas miho cu tanto RCA como Nacional buscando e atake y claro e gol di bay ariba. E bala largo a cuminsa wordo hunga pa asina trata na sorprende den hugada di un contra un. RCA a domina pero no por a defini su hungadonan ehecuta den un gol. Dado momento wega a bira cayente unda arbitro ta hay’e ta saca e masahista cu carchi cora pa reclamo. Mester bisa cu RCA ta lansa un bon atake unda Bennet ta tira duro for di cerca pero portero Cruz ta tapa e bala bon. Despues tabata Baromeo den un bon hugada individual ta los un tiro duro pero un bes mas portero Cruz ta luci y ta pomp esaki. Nacional a lansa algun atake so den e di dos tempo aki pero sin resultado desea. Den e ultimo seconde portero Jose Cruz ta saca un otro bala milagroso di Walter Bennet pa evita e victoria pa RCA.